Xitay aliy sot mehkimisi kéler yildin bashlap ölüm jazasi erzlirini ashkara körüp chiqidu

Xitay aliy sot mehkimisi charshenbe küni, kéler yildin bashlap ölüm jazasigha qayil bolmay aliy sot mehkimisige erz qilghan mehbuslarning délosini ashkara körüp chiqidighanliqini élan qildi. Xitay metbu'atlirining eskertishiche, da'iriler bu arqiliq kishilik hoquqni téximu yaxshi qoghdashni meqset qilidiken.

Shinxu'a axbarat agéntliqi, xitay aliy sot mehkimisining kéler yili 1 - yanwardin bashlap ölüm jazasigha qayil bolmay " talash - tartish qozghighan zor" délolarni ashkara körüp chiqish usuli boyiche bir terep qilish toghrisida qarar chiqarghanliqini bildürdi.

Terepsiz közetküchiler, bu qararni xitay edliye sistémisi islahatidiki ijabiy bashlinish, dep qarisimu, emma buning térrorchiliq we siyasiy mehbuslar délosini öz - ichige alidighan - almaydighanliqidin xatirjem emesken.

Xitay qanuni ölüm jazasigha höküm qilin'ghan délolarni ashkara körüp chiqishqa yol qoysimu, emma xitay edliye organliri hazirghiche ölüm jazasigha munasiwetlik intayin az sandiki bir qisim délolarning erzini ashkara körüp chiqqan. Aliy sot mehkimisi köp hallarda ölüm jazasigha qayil bolmighan mehbuslarning erzini aliy sotning " ichkiy qisimda körüp chiqish" usuli boyiche bir terep qilatti. Aliy sotning yéngi chiqarghan qarari boyiche kéler yili 7 - ayning 1 - künidin bashlap bu xil sotlar puqralargha échiwétilidiken. (Erkin)