Хитай қанун даириси ичидә имкан қәдәр өлүм җазасини аз иҗра қилмақчи

Хитай али сот мәһкимиси пәйшәнбә күни, бундин кейин хитайда өлүм җазаси иҗра қилишни қаттиқ контрол қилидиғанлиқини елан қилди.

Хитай али сот мәһкимиси баянатчисиниң ейтишичә, хитай чоқум өлүм җазасини қаттиқ контрол қилип, өлүм җазаси өлчимини ениқ бекитиш билән биргә, йеник дәриҗидә җинайәт садир қилғанлар билән еғир дәриҗидә җинайәт садир қилғанлар оттурисидики пәрқни ениқ айриған асаста өлүм җазаси иҗра қилидикән.

Баянатчи сөзидә йәнә": биз өлүм җазасини аз иҗра қилиш, өлүм җазасини тоғра иҗра қилиш, принсипи асасида, һәр бир өлүм җазаси делоси үстидә әстайидил тәкшүрүш елип берип, пакит тоғра ениқ болуш, җинайәтни тоғра бекитиш, җаза өлчими мувапиқ болуш, сот һөкүми қанунлуқ болуш қатарлиқ өлчәмләргә чоқум әмәл қилимиз " деди.

Хитай нөвәттә дуня бойичә өлүм җазасини әң көп иҗра қилидиған дөләт , кишилик һоқуқни көзитиш тәшкилатиниң билдүрүшичә, 2005 ‏- йили хитайда иҗра қилинған өлүм җазаси сани, пүтүн дуня бойичә иҗра қилинған өлүм җазасиниң80 % ини игиләйдикән.

Хитай йеқинқи икки йилдин бери өлүм җазаси иҗра қилиш контуруллиқини күчәйтиш билән биргә , өлкә дәриҗилик сотниң өлүм җазаси иҗра қилиш һоқуқини елип ташлиған.

Әмма, хитай сиясий мәһбусларни өлүм җазаси билән әң көп җазалайдиған дөләтләрдин бири болуп, болупму хитайда өлүм җазаси билән җазаланған уйғур сиясий мәһбуслириниң сани интайин көп һесаблиниду. (Әқидә)