Xitay qanun da'irisi ichide imkan qeder ölüm jazasini az ijra qilmaqchi

Xitay ali sot mehkimisi peyshenbe küni, bundin kéyin xitayda ölüm jazasi ijra qilishni qattiq kontrol qilidighanliqini élan qildi.

Xitay ali sot mehkimisi bayanatchisining éytishiche, xitay choqum ölüm jazasini qattiq kontrol qilip, ölüm jazasi ölchimini éniq békitish bilen birge, yénik derijide jinayet sadir qilghanlar bilen éghir derijide jinayet sadir qilghanlar otturisidiki perqni éniq ayrighan asasta ölüm jazasi ijra qilidiken.

Bayanatchi sözide yene": biz ölüm jazasini az ijra qilish, ölüm jazasini toghra ijra qilish, prinsipi asasida, her bir ölüm jazasi délosi üstide estayidil tekshürüsh élip bérip, pakit toghra éniq bolush, jinayetni toghra békitish, jaza ölchimi muwapiq bolush, sot hökümi qanunluq bolush qatarliq ölchemlerge choqum emel qilimiz " dédi.

Xitay nöwette dunya boyiche ölüm jazasini eng köp ijra qilidighan dölet , kishilik hoquqni közitish teshkilatining bildürüshiche, 2005 ‏- yili xitayda ijra qilin'ghan ölüm jazasi sani, pütün dunya boyiche ijra qilin'ghan ölüm jazasining80 % ini igileydiken.

Xitay yéqinqi ikki yildin béri ölüm jazasi ijra qilish konturulliqini kücheytish bilen birge , ölke derijilik sotning ölüm jazasi ijra qilish hoquqini élip tashlighan.

Emma, xitay siyasiy mehbuslarni ölüm jazasi bilen eng köp jazalaydighan döletlerdin biri bolup, bolupmu xitayda ölüm jazasi bilen jazalan'ghan Uyghur siyasiy mehbuslirining sani intayin köp hésablinidu. (Eqide)