Xitay aliy soti yerlik sotchilarning ölüm jazasi bérishte soghuqqan bolushini telep qildi

Xitay aliy sot mehkimisi yéqinda yerlik sotchilargha höjjet chüshürüp, ölüm jazasi bérishte soghuqqan bolush, hökümet bilen hemkarlashqan jinayetchilerni, xiyanet sommisini qayturghan parixor emeldarlarni jazalashta epuchan bolushni telep qildi. Xitay dunya buyiche ölüm jazasini eng köp ijra qilidighan dölet bolup, xelq'ara kishilik hoquqi teshkilatliri xitay edliye séstimisini " adaletsiz" dep tenqid qilmaqta idi.

Közetküchilerning eskertishiche, xitay aliy sotining höjjiti xitayning ölüm jazasini qisqartip, kéler yili yétip kélidighan béyjing olimpik yighinidin burun, xitayning xelq'aradiki obrazini yaxshilimaqchi boluwatqanliqini körsitidu, dep qarimaqta. Xitay aliy sotining tor bétide jüme küni élan qilin'ghan bu heqtiki bayanatta, "ölüm jazasi peqet intayin az sandiki bir qisim pewqul'adde éghir jinayet sadir qilghuchilargha bérilishi kérek " déyilgen. Aliy sotning mezkur höjjiti ötken charshenbe küni her qaysi ölke we aptonom rayonlarning yuqiri sot mehkimilirige ewetilgen.

Közetküchiler, Uyghur aptonom rayoni yuqiri sot mehkimisining mezkur höjjetni ijra qilish ehwaligha diqqet qilishqa toghra kélidighanliqini bildürmekte. Ularning eskertishiche, Uyghur aptonom rayoni xitaydiki siyasiy mehbuslargha ölüm jazasi bérilidighan rayon bolupla qalmay, ölüm jazasi yenggillik bilen ijra qiliniwatqan birdin - bir rayondur.

Dunya Uyghur qurultiyi gérmaniye bash ministiri an'géla markélgha xet yézip, mérkélning 8 ‏- ayda élip barghan xitay ziyaritide Uyghurlargha yenggillik bilen ölüm jazasi bérish mesilisini xitay rehberliri bilen ötküzidighan söhbitide otturigha qoyushni telep qilghan idi. (Erkin)