Xitayda bir doxturxanida yüz bergen ot apitide 39 adem öldi

Xitayning jilin ölkisi lyawyü'en shehiridiki bir doxturxanida peyshenbe küni ot apiti yüz bérip, jüme künigiche az dégende 39 adem öldi. Weqe lyawyü'en merkizi doxturxanisida yüz bergen. Ölgenlerning 24 nepiri ot apiti yüz bergen neq meydanda ölgen bolup, qalghanlar doxturxanigha élip bérilghandin kéyin hayatidin ayrilghan.

Xitay metbu'atlirining xewer qilishiche, nöwette lyawyü'en merkizi doxturxanisidin yötkep apirilghan 180 din artuq bimar, lyawyü'endiki 7 doxturxanigha tarqaqlashturulghan bolup, bimarlar arisidiki 20 din artuq kishining ehwali éghir iken.

Buningdin sirt lyawyü'en doxturxanisidiki doxtur we séstiralardin 10 dek kishi ot apitide yarilan'ghan. Ot apitining sewebi hazirghiche élan qilinmidi. Da'iriler weqede kélip chiqqan maddiy ziyan, adem chiqim bolush ehwali we weqening sewebliri üstide tekshürüsh élip barmaqtiken.

Weqe yüz bergen doxturxana lyaw yü'en shehiri boyiche eng chong doxturxana bolup, ot apiti yüz bergende doxtuxanida 245 neper bimar bar iken. Ot apitide doxturxanining birinchi qewitidin 4 - qewitigiche bolghan ariliq éghir weyranchiliqqa uchrighan. Xitay dunya boyiche tasadipi weqelerde adem ölüsh ehwali eng éghir dölet bolup hésablinidu. (Erkin)