Бейҗиң даирлири олимпик қурулуш мәйданида адәм өлүш һадисисиниң йүз бәргәнликини рәт қилди

2008-01-21
Елхәт
Пикир
Share
Принт

Йәкшәнбә күни әнгилийидә чиқидиған йәкшәнбә вақти ( Sunday Times) гезитидә, 2008- йили авғустта бейҗиңда өткүзидиған олимпик йиғини үчүн тәйярлиниватқан әң чоң тәнтәрбийә мәйданниң қурулуши җәрянида 10 ишчиниң һадисигә учрап өлгәнликини хәвәр қилған иди.

Әмма бүгүн ройтерс агентлиқиниң хәвәр қелишиға қариғанда, бейҗиң даирилири мәзкур қурулуш мәйданида адәм өлүш һадисисиниң йүз бәргәнликини рәт қилған.

Хәвәрдә нәқил қилишичә, бейҗиң олимпик тәшкилләш комитетиниң баянатчиси сүн вейде: "йәкшәнбә вақти гезитиниң дөләтлик тәнтәрбийә мәйданида 10 адәмниң өлгәнлики һәққидики хәвири ялған" дегән.

Сүн мухбирларниң бу һәқтә сориған соаллириға җаваб берип, қурулуш ишлириниң пилан буйичә оңушлуқ елип бериливатқанлиқини һәмдә хитай даирилириниң мәзкур иш орнидики бихәтәрлик ишлириға йеқиндин көңүл болуп кәлгәнликини оттуриға қойған.

Алдинқи күни, әнглийидә чиқидиған йәкшәнбә вақит гезитидә бу тәнтәрбийә мәйданиниң қурулуши җәрянида һазирға кәлгичә илгири ‏- кейин болуп 10 адәмниң өлгәнликини, буниңға қарита бу қурулуш орнида илгири ишлигән ишчиларниң гуваһлиқ бәргәнликини хәвәр қилған иди.

"Қуш увиси" дәп атидиған 400 милйон долларлиқ бу тәнтәрбийә мәйдани йәнә 200 күндин кийин 2008- йиллиқ олимпик йиғини өткүзүлидиған 36 тәнтәрбийә мәйданиниң ичидики әң чоң бирси болуп һесаблиниду.

Пикирләр (0)
Share
Толуқ бәт