Nenkey uniwérsitétida oqughuchilar topilingi yüz berdi

Xitayning tyenjin shehiridiki nenkey uniwérsitétida oqughuchilar topilingi yüz bérip, nechche ming oqughuchi mashinilarni urup chaqqan we topilangni basturmaqchi bolghan saqchilar bilen toqunushqan. Merkizi axbarat agéntliqining xewer qilishiche, aldinqi küni yüz bergen topilanggha bir aptomobilning mektep qorusida bir oqughuchini soquwétishi we aptomobil igisining epu sorimayla qalmay, adem bashlap kélip oqughuchilarni urush weqesi sewebchi bolghan bolup, oqughuchilar topliship bu kishiler bilen élishqan.

Oqughuchilar bilen weqe tüghdurghuchilar otturisidiki toqunushni basturmaqchi bolup kelgen saqchilar, weqe tughdurghuchilargha yan basqan we bir oqughuchini tutup saqchi aptomobiligha solimaqchi bolghan. Buningdin ghezeplen'gen oqughuchilar saqchilargha hujum qilip, bir saqchini urup yatquzuwetken.

Bu jeryanda mektep mudirining neq meydan'gha kelmigenliki shundaqla saqchilarning weqe tughdurghuchilarni sürüshtürmigenlikidin téximu ghezeplen'gen oqughuchilar, weqe tüghdurghuchining aptomobilini urup chéqiwetken hemde qalaymiqanchiliq seyshenbe küni etigen seherge qeder dawamlashqan.

Axirida nenkey uniwérsitétining mu'awin mudiri jang jing neq meydan'gha kélip oqughuchilargha weqege qatnashqanlarning mes'uliyitini sürüshtürmeslikke, mektep qorusining qatnash ehwalini yaxshilash we weqe tughdurghuchini qanun buyiche sürüshtürüshke wede qilghandin kéyinla oqughuchilar yataqlirigha tarqalghan.

Lékin xewerlerge qarighanda weqege yitekchilik qilghan bir oqughuchini saqchilar tutup ketken. Yéqinqi yillardin béri xitay aliy mektepliride saqchilar bilen oqughuchilar toqunushup qalidighan weqeler pat - pat yüz bermekte. (Erkin)

Buni bésish arqiliq, pikringizni yézing

• Print
• Hembehr
• Ewetish

Barliq pikir - bayanlarni körüsh.

• Bügünki anglitish
• Ilgiriki anglitishlar