Xitaydiki ösmür balilarni sétish jinayiti yene bir qétim ashkarilandi

Xelq'ara metbu'atlarda xitayning ösmür balilarni sétishqa da'ir qilmishliri köplep ashkarilanmaqta. En'giliye téléwiziyisi 4 ‏- qanilining kéler aydin bashlap qoymaqchi bolghan xitayda yüz bériwatqan balilarni sétishqa a'it höjjetlik filimde her yili az dégende 70 ming ösmürning qanunsiz yollar arqiliq bashqa jaylargha élip kétilidighanliqi teswirlen'gen.

Xitayning londonda turushluq bash elchixanisi, en'giliye téléwiziyisi 4 ‏- qanilining mezkür höjjetlik filim heqqide özlirini aldin xewerlendürmigenlikidin qattiq narazi bolup, filimdiki mezmunlarning toghra emeslikini, bolupmu filimde eks ettürülgen junggoning bir perzentlik siyasitining balilarni sétish jinayiti bilen héchqandaq munasiwiti yoqluqini tekitligen hemde mezkür filimni tarqatmasliq üchün tirishqan.

En'gliyide chiqidighan " taymiz " gézitining xewirige qarighanda, xitay bash elchixanisi yene en'giliyining axbarat bashqurush idarisi bilen alaqe qilip, 8 ‏- öktebir küni qoyulmaqchi bolghan höjjetlik filimni qoymasliqni telep qilghan. Bu arida xitay elchixanisining axbarat bayanatchisi, junggo da'irilirining balilarni sétish mesili'isni azaytish üchün zor tirishchanliq körsetkenlikini, hazir ehwalda yaxshilinish meydan'gha kelgenlikini ilgiri sürgen. Emma filim mes'ulliri xitay elchixanisigha özlirining filim ishlesh jeryanida qolgha chüshürgen pakitliq matériyallirini yollighan.

En'giliye téléwiziyisi 4 ‏- qanilining filim ishlesh etriti, xitay ölkiliride öz balilirini satqan ata ‏- anilar we adem bidiklirining balilarni sétish jeryanidiki neq meydan körünüshlirini sin'alghugha chüshürüwalghan iken. Mezkur qanal ilgiri Uyghurlarning atom sinaqlirining ziyankeshlikige uchrighanliqigha da'ir 2 qisimliq filim ishlep tarqatqan idi. (Eqide)