Хитайда йәнә мәҗбурий өй чиқиш вәқәси йүз бәрди

Хитайниң сичүән өлкиси зигуң шәһәрлик һөкүмити йеқинда 200 гә йеқин сақчи вә қораллиқ әскәр қисимлирини ишқа селип, 3 аиликни өзигә тәвә йәр зиминлиридин көчүшкә мәҗбурлап, ойлирини чеқишқа урунғанда, шу җайдики 2 миңдин артуқ аһалиниң қоршавиға елинған. Сақчилар мәқситигә йетәлмәй, әтиси сәһәр саәт 5 тә йәнә 200 нәпәр қораллиқ хадим билән бирликтә мәҗбурий өй чиқиш һәрикити елип барған.

Өй чиқиш җәрянида, 7 киши яриланған болуп, уларниң ичидики яшанған 3 киши еғир дәриҗидә зәхмилинип, һазир дохтурханида даваланмақта икән.

Хәвәрләргә қариғанда, нөвәттә зигуң шәһиридә тавар өйлириниң һәр квадрат метири 2000 йүәндин артуқ һесаблинидиғанлиқи бекитилгән, әксичә шәһәрлик һөкүмәтниң һәр квадрат метирға төлигән һәққи аран 350 йүәндин 400 йүәнгичә болған. Өй игилири төләм һәққиниң төвәнлики вә давасини аңлайдиғанларниң йоқлуқи сәвәблик өйлириниң чеқилишини рәт қилған.

Хитайда йүз бәргән һөкүмәт билән қаршилишидиған хәлқ наразилиқ һәрикәтлириниң көпинчиси, аһалиларниң шәхси өй - маканлирини мәҗбурий бузуп чиқип, йәрлирини тартивелиш сәвәбидин мәйданға кәлмәктә. (Әқидә)