Шаңхәйдә бир киши өйидин мәҗбурий көчүрүлгәнлики сәвәбидин өзини өлтүрүвалған

Шаңхәйдә бир киши мәҗбурий көчүрүлгәнлики сәвәбидин өзини өлтүрүвалған. Истансимизниң бу һәқтә игилигән хәвиридин мәлум болушичә, 26 ‏- март күни чүштин кейин саәт 7 ләр әтрапида, шаңхәй хуаңпу райони тибәт җәнубий йоли 1664 ‏- номурлуқ өйдики бир киши бинадин өзини ташлап өлүвалған.

Мәзкүр вәқә, 2010 ‏- йили шаңхәйдә өткүзүлидиған хәлқара көзгәзмә тәйярлиқи үчүн елип бериливатқан мәҗбурий көчүрүш сәвәбидин мәйданға кәлгән. Чеқивитилмәкчи болған бу җай51 яшлиқ чаң давҗунниң тиҗаритигә зиян елип келидиғанлиқи үчүн, чаң 2 ‏- айда өйидин газ чиқирип өлүвалмақчи болған, у дохтурханида бир мәзгил давалинип қутқузувелинған болсиму, буниңға писәнт қилмиған өй көчүрүш идариси чаңға давамлиқ тәһдит ишләткән. Мушу айниң 26 ‏- күни бу җайниң қәтий чиқивитилидиғанлиқидин хәвәр тапқан чаң бинадин өзини ташлап өлүвалған.

Һазир, чаңниң аяли әгәр бу иш адиллиқ билән һәл қилинмиса, ериниң ахирәт ишлирини биҗирмәйдиғанлиқини, җәсәтни дохтурханидин йөткимәйдиғанлиқини билдүрди.

Истансимиз хуаңпу районидики өй көчүрүш идарисигә телефун уруп бу вәқәни сүрүштә қилғанда, улар чаңниң өлүминиң өзлири билән һечқандақ алақисиниң йоқлиқини билдүрди. Буниңдин сирт амминиң ейтишичә, чаңниң оғли өй көчүрүш идарисидикиләр билән қаттиқ җидәлләшкән әмма сақчилар буниңға писәнт қилмиған.

Көзәткүчиләр бу вәқә түпәйли, һөкүмәткә қарши наразилиқ һәрикитиниң қозғилип кетишини пәрәз қилишмақта. (Әқидә)