Shangxeyde bir kishi öyidin mejburiy köchürülgenliki sewebidin özini öltürüwalghan

Shangxeyde bir kishi mejburiy köchürülgenliki sewebidin özini öltürüwalghan. Istansimizning bu heqte igiligen xewiridin melum bolushiche, 26 ‏- mart küni chüshtin kéyin sa'et 7 ler etrapida, shangxey xu'angpu rayoni tibet jenubiy yoli 1664 ‏- nomurluq öydiki bir kishi binadin özini tashlap ölüwalghan.

Mezkür weqe, 2010 ‏- yili shangxeyde ötküzülidighan xelq'ara közgezme teyyarliqi üchün élip bériliwatqan mejburiy köchürüsh sewebidin meydan'gha kelgen. Chéqiwitilmekchi bolghan bu jay51 yashliq chang dawjunning tijaritige ziyan élip kélidighanliqi üchün, chang 2 ‏- ayda öyidin gaz chiqirip ölüwalmaqchi bolghan, u doxturxanida bir mezgil dawalinip qutquzuwélin'ghan bolsimu, buninggha pisent qilmighan öy köchürüsh idarisi changgha dawamliq tehdit ishletken. Mushu ayning 26 ‏- küni bu jayning qet'iy chiqiwitilidighanliqidin xewer tapqan chang binadin özini tashlap ölüwalghan.

Hazir, changning ayali eger bu ish adilliq bilen hel qilinmisa, érining axiret ishlirini bijirmeydighanliqini, jesetni doxturxanidin yötkimeydighanliqini bildürdi.

Istansimiz xu'angpu rayonidiki öy köchürüsh idarisige téléfun urup bu weqeni sürüshte qilghanda, ular changning ölümining özliri bilen héchqandaq alaqisining yoqliqini bildürdi. Buningdin sirt ammining éytishiche, changning oghli öy köchürüsh idarisidikiler bilen qattiq jidelleshken emma saqchilar buninggha pisent qilmighan.

Közetküchiler bu weqe tüpeyli, hökümetke qarshi naraziliq herikitining qozghilip kétishini perez qilishmaqta. (Eqide)