Пакистан билән һиндистан кәшмир мәсилиси бойичә юқири дәриҗиликләр сөһбити өткүзди

Пакистан билән һиндистан ташқи ишлар министирлири йәкшәнбә күни йеңи деһлида учришип, кәшмир мәсилисини асаси музакирә темиси қилған икки дөләт оттурисидики тинчлиқ мәсилилири бойичә сөһбәт елип барди.

Һиндистан ташқи ишлар министирликиниң баянатчиси, икки дөләт ташқи ишлар министирлири оттурисидики сөһбәтниң достанә, дурус, сәмимий вә иҗабий характерлик өткәнликини тәкитлиди. Бу һиндистан билән пакистан ташқи ишлар министирлириниң йеқинқи үч йилдин бери елип барған тунҗи қетимлиқ сөһбити болуп һесаблиниду. Сөһбәтниң темиси кәшмир мәсилисини асас қилғандин сирт, икки дөләт оттурисидики транспорттин тартип мәдәнийәт алмаштурушқичә болған барлиқ мәсилиләргә четилған.

Сөһбәт һиндистан ташқи ишлар министири натвар сиң билән пакистан ташқи ишлар министири хуршид махмуд қасури оттурисида елип берилди . Британийә радио телевизийә ширкити б б с , икки тәрәп оттурисидики сөһбәтниң интайин кәскин өткәнликини илгири сүрди .

Пакистан тәрәп кәшмир мәсилиси икки тәрәп оттурисидики сөһбәтниң мәркизи темиси дегән қарашта чиң туруп , кәшмир мәсилисини һәл қилиш җәнубий асиядики бихәтәрлик вә тинчлиқниң капалити дәп көрсәткән . Һиндистан баш министири манмохан сиң , кәшмирдики қораллиқ тәшкилатлар билән шәртсиз сөһбәт өткүзүшни оттуриға қойған . Һиндистан билән пакистан оттурисида икки йил илгири кәшмир мәсилиси сәвәбидин 4 - қетим уруш партлашқа қил қалған иди .Икки дөләт кәшмир мәсилиси бойичә 1947 йилдин бери 3 қетим уруш қилған .