Хитай билән пакистан кәң даирилик келишимләр имзалиди


2006.02.20
Share on WhatsApp
Share on WhatsApp

Хитайни зиярәт қиливатқан пакистан президенти пәрвиз мушәррәф дүшәнбә күни 3 нәпәр хитай инженириниң пакистандики қәбилә милитанлири тәрипидин өлтүрүлгәнлики мунасвити билән әпу сорап, бейҗиң даирилириниң көңлини елишқа тиришти. У, хитай инженирлириниң өлтүрүлүш вәқәсини пакистанниң йүзигә "дағ тәккүзгәнлик" дәп тәкитлигән вә җавапкарларниң шәпқәтсизләрчә җазалинидиғанлиқини билдүргән.

Икки дөләт рәһбәрлири дүшәнбә күни сода, дөләт мудапиә, йәр тәврәш тәтқиқати вә пиланлиқ туғут қатарлиқ түрләр бойичә кәң даирилик келишимләр имзалиди. Мушәррәфниң хитайда елип бериватқан 5 күнлик зиярити йәкшәнбә күни башланған. У, өткән һәптә 3 нәпәр хитай инженириниң балуҗистанда йәрлик қәбилә милитанлири тәрипидин өлтүрүлүш вәқәси һәққидә пакистанниң " әпу сорайдиғанлиқини вә қайғурғанлиқини" әскәртип, зияритиниң икки дөләт оттурисидики узун - муддәтлик иттипақдашлиқ мунасвитини күчәйтидиғанлиқини билдүргән. У, " бу вәқә пакистанниң йүзигә дағ тәккүзди" дәйду.

Униң хитай хәлқ қурултийи рәиси ву баңгоға әскәртишичә, " пакистан пуқралири хитайни сөйидикән." Шинхуа ахбарат агентлиқи мушәррәфниң җавапкарларни " еғир вә шәпқәтсизләрчә җазалаймиз " дәп вәдә бәргәнликини хәвәр қилған. У, шу күни хитай дөләт рәиси ху җиңтав билән хәлқ сарийида учрашти. Тәрәпләр шу күни кәң даирилик мәзмундики 13 хил келишимгә имза қойған.

Хитай пакистанни қорал - ярақ вә назук техникилар билән тәминләйдиған асаслиқ дөләт. Ғәрб дөләтлири бейҗиңни пакистанға балистик бомба техникиси вә әслиһәлирини сетип бериш билән әйиблимәктә. Шуниң билән биргә исламабад, шәрқий түркистан күчлириниң пакистандики паалийитини бастуруш мәсилисидә актип болупла қалмай, пакистандики хитай пуқралириниң һуҗумға учраш вәқәлиригә алаһидә көңүл бөлмәктә. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.