Xitayda bir ministir muddetsiz qamaq jazasigha höküm qilindi


2005.12.27
Share on WhatsApp
Share on WhatsApp

Xitayning yer - zimin we tebi'iy bayliqlar ministirliqining sabiq ministiri tyen féngshen 500 ming dollar para élish jinayiti bilen eyiblinip, seyshenbe küni muddetsiz qamaq jazasigha höküm qilindi.

Shinxu'a axbarat agéntliqining xewer qilishiche, béyjing sheherlik 2 - ottura xelq sot mehkimisi tyen féngshenni 1996 -yildin 2003- yilghiche 538 ming dollar para élip jinayet shekillendürdi, dep qarighan. Sot mehkimisining hökümiti boyiche tyen féngshenning barliq mal mülki musadire qilinip siyasi hoquqidin menggülük mehrum qilindi. Tyen féngshyen ilgiri xéylongjyang ölkisining ölke bashliqi idi. U, 2000- yili xitay döletlik yer - zimin we teb'iy bayliqlar ministirliqining ministiri bolup teyinlen'gen idi.

Shinxu'a axbarat agéntliqi, tyen féngshenni "dölet xadimi bolsimu emma u xizmettiki qolayliqi we hoquqidin paydilinip, shexsi menpe'etige chogh tartqan we qanunsiz para yégen" dep eyiblidi.

Xitay da'iriliri hazirghiche tyen féngshenning xiyanetchilik qilmishigha da'ir tepsili ehwallarni ashkarilimidi. Emma tyen féngshen, 2003 - yili wezipisidin yiraqlashturulup qolgha élin'ghandin kéyin, xitay metbu'atliri uning yer - zimin sodisigha da'ir xiyanetchilik setchilikige chétilip qalghanliqini xewer qilghan.

Shinxu'a axbarat agéntliqining ashkarilishiche, sot mehkimisi tyen féngshen xiyanet qilghan barliq pul- püchek we maddi buyumlarning qayturuwélin'ghanliqini bildürgen. Sot mehkimisi tyen féngshen qobul qilghan parining " pewqul'adde zor" ikenlikini eskertmekte. Buningdin ilgiri tyen féngshen bilen birge eyiblen'gen xéylongjyang ölkilik partkomning sabiq mu'awén sékritarigha ölüm jazasi bérilip ikki yil kéchiktürüp ijra qilish höküm qilin'ghan idi. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.