Xitayda gaz turubisi partlash weqesi yüz bérip 9 adem öldi

Xitayning gherbiy jenubi ölkisi sichüende jüme küni gaz turubisi partlash weqesi yüz bérip, 9 adem öldi, az dégende 10 adem yarilandi. Shinxu'a axbarat agéntliqining xewer qilishiche, partlash weqesi sichüenning rénshu nahiyisidiki junggo néfit shirkitige qarashliq gaz turubisining partlap kétishi sewebidin kélip chiqqan.

Junggo néfit shirkiti tor bétide élan qilghan bayanatida ölgenlerning sanini 8 dep élan qildi. Biraq mezkur bayanat shinxu'a axbarat agéntliqining xewiridin burun élan qilin'ghan. Ölgenlerning heqiqi sani toghrisida alaqidar terepler hazirghiche éniq bir melumat bermidi.

Roytérs axbarat agéntliqining yerlik da'irilerdin neqil keltürüshiche, partlash weqesi rénshu nahiyisining wangyang we wén'gong yéziliri arisidiki bir gaz pompilash istansisida yüz bergen. Junggo néfit shirkitining jilin ölkisidiki bir ximiye zawutida ötken yili 12 - ayda yüz bergen partlash weqesi sung xu'ajyang deryasining éghir derijide bulghinishini keltürüp chiqarghan. Bu milyonlighan kishining ichimlik su mesilisige tesir yetküzüp, xitay rusiyige tölem töleshke mejbur bolghan idi.

Junggo néfit shirkiti téxi yéqinda chaqirghan bir qétimliq xizmet yighinida, xitay boyiche 2010 - yilghiche éghir hadisilerning yüz bermeslikige kapaletlik qilishni otturigha qoyghan. Junggo bixeter ishlepchiqirishni nazaret qilish idarisi, 10 din artuq adem ölgen hadisilerge chong weqeler, dep éniqlima bergen. (Erkin)