Сичүәндә бир сот мәһкимисидә өзини өлтүрвелиш характерлик партлаш йүз бәрди


2006.04.06

5 ‏- Април күни сичүән өлкиси, гуаңйүән шәһәрлик оттура хәлқ сот мәһкимисиниң хизмәт бинасида туюқсиз партлаш йүз берип, бир адәмниң өлүмини, бир сотчиниң ярилинишини кәлтүрүп чиқарди.

Мәркизи агентлиқиниң бүгүн тәйбейдин бәргән хәвиридин қариғанда, вәқә төнүгүн чүштин бурун 10 әтрапида йүз бәргән болуп, бәдинигә партлатқуч бомба таңған намәлум бир әр нәқ мәйданда өлгән, бир нәпәр сотчи еғир яриланған.

Хәвәрләрдин мәлум болушичә, партлаш вәқәси йүз бериштин бурун, бир кишиниң партлатқуч бомбини теңип, сот мәһкимиси қорасиға кирип кәткәнлики тоғрисида хәвәр таралған икән.

Гуаңйүән шәһиридики аһалиләрниң ейтишичә, бу қетим йүз бәргән партлаш вәқәси өзини өлтүрвелиш характерлик һуҗумдин ибарәт болуп, нөвәттә хитайда пуқралар һөкүмәтниң адил болмиған сияситигә дуч кәлгәндә һәр хил шәкилләрдә өз наразилиқини билдүридиған вәқәләр күндин - күнгә көпийип кәткән.

Хитай һөкүмитиниң һә десила ,уйғурларни террорчи дәп әйибләйдиған шикайити үстидин қаттиқ наразилиқ билдүргән дуня уйғур қурултийиниң баянатчиси дилшат ришит, "мәзкүр партлаш вәқәсигә хитай һөкүмитиниң һечқандақ баһа бәрмәй, сүкүттә туруш қилмиши уйғурлар билән хитайларға икки хил сиясәт йүргүзүштәк әпти - бәширисини ашкарилайду, әгәр бу партлаш вәқәси бир уйғур тәрипидин елип берилған болса , у чоқум террорчилиқ қалпиқи билән җазалинатти" дәп көрсәтти. (Әқидә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.