Sichüende bir sot mehkimiside özini öltürwélish xaraktérlik partlash yüz berdi


2006.04.06

5 ‏- April küni sichüen ölkisi, gu'angyüen sheherlik ottura xelq sot mehkimisining xizmet binasida tuyuqsiz partlash yüz bérip, bir ademning ölümini, bir sotchining yarilinishini keltürüp chiqardi.

Merkizi agéntliqining bügün teybéydin bergen xewiridin qarighanda, weqe tönügün chüshtin burun 10 etrapida yüz bergen bolup, bedinige partlatquch bomba tangghan namelum bir er neq meydanda ölgen, bir neper sotchi éghir yarilan'ghan.

Xewerlerdin melum bolushiche, partlash weqesi yüz bérishtin burun, bir kishining partlatquch bombini téngip, sot mehkimisi qorasigha kirip ketkenliki toghrisida xewer taralghan iken.

Gu'angyüen shehiridiki ahalilerning éytishiche, bu qétim yüz bergen partlash weqesi özini öltürwélish xaraktérlik hujumdin ibaret bolup, nöwette xitayda puqralar hökümetning adil bolmighan siyasitige duch kelgende her xil shekillerde öz naraziliqini bildüridighan weqeler kündin - kün'ge köpiyip ketken.

Xitay hökümitining he désila ,Uyghurlarni térrorchi dep eyibleydighan shikayiti üstidin qattiq naraziliq bildürgen dunya Uyghur qurultiyining bayanatchisi dilshat rishit, "mezkür partlash weqesige xitay hökümitining héchqandaq baha bermey, sükütte turush qilmishi Uyghurlar bilen xitaylargha ikki xil siyaset yürgüzüshtek epti - beshirisini ashkarilaydu, eger bu partlash weqesi bir Uyghur teripidin élip bérilghan bolsa , u choqum térrorchiliq qalpiqi bilen jazalinatti" dep körsetti. (Eqide)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.