Ләнҗудики бир нефит химийә завутида партлаш вәқәси йүз бәрди

Хитайниң ләнҗу районидики җуңго нефит ширкитигә қарашлиқ бир нефит химийә завутида сәйшәнбә күни партлаш вәқәси йүз берип, 4 адәм өлди, 11 адәм яриланди. Шинхуа ахбарат агентлиқиниң хәвәр қилишичә, яриланғанлар ичидә 4 кишиниң әһвали еғир икән.

Мунасивәтлик даириләр вәқәниң келип чиқиш сәвәби үстидин тәкшүрүш елип бериливатқанлиқини билдүрди. Партлаш вәқәси завутниң бир ишләпчириш сехи римонт қилиниватқанда йүз бәргән. Вәқәдин кейин даириләр зәһәрлик маддиларниң әтраптики су мәнбәси вә дәря‏ - еқинларға еқип кетишидин сақлиниш үчүн тәдбир елишқа башлиди. Муһит қоғдаш органлири һазирғичә әтрапдики дәря вә су мәнбәлиридә булғиниш аламәтлири көрүлмигәнликини билдүрмәктә.

Өткән қетим хитайниң җилин өлкисидә бир нефит химийә завути партлап кетип, зәһәрлик маддилар суңхуаҗяң дәрясиға еқип киргән вә дәря сүйини еғир дәриҗидә булғиған. Мунасивәтлик даириләр әйни чағда вәқәни кишиләрдин йошурған иди. Партлаш вәқәси йүз бәргән ләнҗудики бу завут җуңго нефит ширкитигә тәвә болуп, бу ширкәт дөләт игиликидики 3 чоң хитай нефит ширкитиниң бири болуп һесаблиниду.

Җуңго нефит ширкити уйғур аптоном районида нефит қезиш мәшғулати билән шуғуллинидиған вә қазақистан нефит игиликигә мәбләғ салған ширкәтләрниң бири. Йеқинда җуңго нефит ширкити мәбләғ салған қазақистан - хитай атасу - алатав нефит турубисида қарамай еқитилишқа башлиған иди. (Әркин)