Lenjudiki bir néfit ximiye zawutida partlash weqesi yüz berdi

Xitayning lenju rayonidiki junggo néfit shirkitige qarashliq bir néfit ximiye zawutida seyshenbe küni partlash weqesi yüz bérip, 4 adem öldi, 11 adem yarilandi. Shinxu'a axbarat agéntliqining xewer qilishiche, yarilan'ghanlar ichide 4 kishining ehwali éghir iken.

Munasiwetlik da'iriler weqening kélip chiqish sewebi üstidin tekshürüsh élip bériliwatqanliqini bildürdi. Partlash weqesi zawutning bir ishlepchirish séxi rimont qiliniwatqanda yüz bergen. Weqedin kéyin da'iriler zeherlik maddilarning etraptiki su menbesi we derya‏ - éqinlargha éqip kétishidin saqlinish üchün tedbir élishqa bashlidi. Muhit qoghdash organliri hazirghiche etrapdiki derya we su menbeliride bulghinish alametliri körülmigenlikini bildürmekte.

Ötken qétim xitayning jilin ölkiside bir néfit ximiye zawuti partlap kétip, zeherlik maddilar sungxu'ajyang deryasigha éqip kirgen we derya süyini éghir derijide bulghighan. Munasiwetlik da'iriler eyni chaghda weqeni kishilerdin yoshurghan idi. Partlash weqesi yüz bergen lenjudiki bu zawut junggo néfit shirkitige tewe bolup, bu shirket dölet igilikidiki 3 chong xitay néfit shirkitining biri bolup hésablinidu.

Junggo néfit shirkiti Uyghur aptonom rayonida néfit qézish meshghulati bilen shughullinidighan we qazaqistan néfit igilikige meblegh salghan shirketlerning biri. Yéqinda junggo néfit shirkiti meblegh salghan qazaqistan - xitay atasu - alataw néfit turubisida qaramay éqitilishqa bashlighan idi. (Erkin)