Xitayning pay bazirida yüz bergen apet xaraktérlik töwenleshning sewebi néme?

Xelq'arada ikki kündin buyan, 27 ‏- féwral küni xitayning pay bazirida yüz bergen apet xaraktérlik töwenlesh weqesi we uning sewebliri heqqidiki mulahiziler boluwatidu. B b s ning xewer qilishiche, xitayning pay bazirida 27 ‏- féwral küni yüz bergen apet xaraktérlik töwenlesh weqesi hazir dunya pay bazirida 10 yildin buyan yüz bergen eng chong apet xaraktérlik töwenlesh dep qaralmaqta.

Mushu bir kün ichide, xitayning dölet igilikidiki shirketlirining pay chéki 600 tochkidin artuq, bezi xongkong pay chekliri hetta bir ming tochka chüshüp ketken. Yaponiye, sin'gapor, malayshiya, filipin, awstraliye hetta en'giliye, amérikilarmu bu "apet" ning tesirige uchrighan. Gerche 28 ‏- féwral küni xitayning pay bazirida qaytidin nahayiti zor küch bilen yuqiri orlesh körülgen bolsimu, emma yenila apetni qaplashtin téxi yéraqta.

Xitayning pay bazirida yüz bergen apet xaraktérlik töwenlesh weqesini, xitaydiki fuchang pay chéki tijaret ornining mudiri yen changning mulahize qilishiche, bu weqe hökümetning pay baziririni kontrol qiliwélishtin qol üzmigenliki, pay bazirining bazar igilikining yétekchilikide bolushini tosuwalghanliqi, bezi shirketler özining paylirini pursetpereslik qilip satqanliqi qatarliq eqilgha muwapiq bolmighan wastilar sewebidin peyda bolghan. Emma gherbning meblegh salghuchiliri bolsa, bu asasen xitayning iqtisadidiki "mazghap sharlar" téshilip ketkenliktin bolghan dep qarimaqta we buning aqiwitidin endishe qilmaqta. (Weli)