Xitay da'iriliri pilanliq tughut siyasitini izchil kücheytmekte

Xitay hökümiti Uyghurlargha qaratqan pilanliq tughut siyasitini izchil kücheytip, mezkür xizmetni her bir nahiye buyiche ching tutush, xizmetlerdiki qéyin nuqtilarni tetqiq qilip mesilini téz hel qilish charilirini yolgha qoymaqta.

Xitay xewer wastilirining bügün bergen melumatidin ashkarilinishiche, peqet bir xoten nahiyisidila yéqinqi üch yildin buyan, pilanliq tughutqa sélin'ghan sélinma 13 milyon 40 ming yüen'ge yetken, nahiye buyiche pilanliq tughutni yolgha qoyghan déhqan ‏- chawichilargha tarqatqan mukapat, toluqlima meblegh, maddiy eshyalarning qimmiti 3 milyon 245 ming yüen'ge, nahiye buyiche pilanliq tughut sherep guwahnamisi alghan déhqan - charwichilar sani 2 ming 164 a'ilige, dölet, aptonom rayon we nahiyining 2 ming yüendin artuq mukapatigha érishkenler 1 ming 328 ge, angliq halda tughut cheklesh opiratsiyisi qildurghanlar sani 5 ming 325 ge yetken.

Xitay da'irilirining Uyghurlarni az sanliq millet dep atap turup, ular üstidin mejburiy pilanliq tughut siyasiti yürgüzishining özi xelq'ara qanunlargha uyghun emes dep bildürüwatqan chet'ellerdiki Uyghur kishilik hoquq teshkilatliri"her xil hile ‏- mikirlik charilerni ishqa sélish, mesilen, maddiy jehettin mukapatlash tüzümi arqiliq xelqni aldash, xitayning pilanliq tughut siyasitidiki yene bir xil mejburlash charisi" déyishmekte.

Xitay, uzun yillardin béri, Uyghurlarni az tughup béyishqa yüzlinishke chaqirmaqta, biraq az perzent körgen bir Uyghur a'ilisining turmush sewyisi, xitayning ichkiri ölkiliridiki namrat a'ile dep qaralghan a'ilining turmushidin nechche hesse töwen sewiyide hésablinidu. (Eqide)