Kolin powél xitayni ziyaret qildi

Amérika tashqi ishlar ministiri kolin powél jüme küni béyjinggha yétip kélip, shimaliy koriye yadro qorallar krizisi we teywen mesilisini asas téma qilghan xitaydiki ziyaritini bashlidi. Xitay tashqi ishlar ministirliqining bayanatchisi jang chiyö, kolin powéll bilen bolghan söhbetlerde xitay rehberlirining teywen mesilisini otturigha qoyidighanliqini bildürdi. Jang chiyö, " biz teywen mesilisini xitay - amérika munasiwitidiki eng muhim we eng nazuk mesile dep qaraymiz" dep tekitligen. Perezlerge qarighanda kolin powéll béyjing da'irilirini teywen bilen söhbet élip bérishqa heydekchilik qilishi, shundaqla teywen'ge qoral - yaraq sétip bérish mesiliside béyjing da'irilirini xatirjem qilishqa tirishishi mümkin.

Kishilik hoquq mesiliside kolin powéllning "nyu - york waqti géziti" tetqiqatchisi jaw yenning qolgha élinishini öz ichige alghan bezi kishilik hoquq dilolirini tilgha alidighanliqi ilgiri sürülmekte. Kolin powéll xitaygha bérishtin ilgiri yaponiyini ziyaret qilip, bash ministir koyzumi bilen shimali koriye yadro qorallar krizisini muzakire qildi. U, shimaliy koriyining 6 terep söhbet üstilige qaytip kélish yolidiki 3 aldinqi shertini ret qilghan. Shimaliy koriyining 3 aldinqi sherti, amérika pyongyanggha qaratqan düshmenlik siyasitidin waz kéchish, shimaliy koriye yadro qorallar pilanini tonglitish bedilige amérikining maddiy yardimige érishish, jenubiy koriyining yadro siniqini muzakire qilish qatarliqlarni öz ichige alidu. (Erkin)