خىتاي خەلق بانكىسى ئامانەت قەرز ئۆسۈمىنى كۆپەيتتى

خىتاي خەلق بانكىسى پەيشەنبە كۈنى قارار چىقىرىپ، خىتايدىكى پۇل - مۇئامىلە ئورگانلىرىنىڭ ئامانەت قەرز ئۆسۈمىنى يۇقىرى كۆتەردى. شۇنداقلا ئامانەت - قەرز ئۆسۈمىنىڭ رايونلار ئوتتۇرىسىدا پەرقلىق بولۇشىغا يول قويغان. خەلق بانكىسىنىڭ قارارى بويىچە ئامانەت قەرز سوممىسىنىڭ يىللىق ئۆسۈمى ھازىرقى ٪ 5.31 تىن ٪ 5.58 گە ئۆستۈرۈلگەن. خەلق بانكىسىنىڭ تور بېتىدە بىلدۈرۈشىچە، ئامانەت قەرز ئۆسۈمىنى يۇقىرى كۆتۈرۈش بايلىقنىڭ ئىقتىسادى ۋاسىتىلەر ئارقىلىق تەقسىم قىلىنىشىغا پايدىلىق بولۇپ، كارخانىلار مەبلەغنى چاڭگىلىغا ئېلىۋېلىشنىڭ ئالدىنى ئالىدۇ دەپ كۆرسەتكەن.

بىرلەشمە ئاخبارات ئاگېنتلىقىنىڭ خەۋەر قىلىشىچە، نۆۋەتتە خىتايدا مەبلەغنىڭ كۆپىيىشى بىلەن ئىقىتىسادنىڭ قىزىپ كېتىش ئەھۋالى ئېغىر بولۇپ، مال باھاسىنىڭ ئۆرلىشى يېقىنقى 7 يىلدىن بېرىقى ئەڭ يۇقىرى سەۋىيىگە يەتكەن . شۇنداقلا يەنە خەلق پۇلىنىڭ قىممىتى ئېشىپ كېتىشتەك ئەھۋالغا دۇچ كەلگەن. مۇتەخەسسىسلەر، خىتاينىڭ نوقۇل مەمۇرىي ۋاستىلارغا تايىنىپ ئىقتىسادتىكى قىزىپ كېتىش ۋەزىيىتىگە خاتىمە بېرەلمەيدىغانلىقىنى بىلدۈرمەكتە. خەلق بانكىسىنىڭ قارارىدىن كېيىن جۈمە كۈنى خىتايدا دوللارنىڭ ھەر قايسى ئاساسلىق پۇللار بىلەن بولغان ئالماشتۇرۇش قىممىتى تېز ئارىدا ئۆزگەردى. دوللارنىڭ پۇل- مۇئامىلە بازىرىدىكى كۆرسەتكۈچى 86 گە يېقىنلىشىپ، 85.89 غا چىققان. (ئەركىن)