Хитай хәлқ пулиниң қиммитини көтүрүш бесимиға баш әгмәйдиғанлиқини билдүрди

Хитай хәлқ банкиси пәйшәнбә күни чәтәлниң қаттиқ бесимиға учрисиму, хәлқ пулиниң қиммитини өстүрмәйдиғанлиқини билдүрди. Хитай хәлқ банкисиниң муавин башлиқи ву шявлиң бу сөзни пәйшәнбә күни хәлқ банкисиниң тор бетидә елан қилған.

Франсийә ахбарат агентлиқиниң хәвиригә қариғанда, ву шявлиң: америка дөләт мәҗлиси "әгәр бейҗиң хәлқ пулиниң қиммитини қайта тәңшимисә, хитайдин импорт қилинидиған малларға җаза характерлик баҗ алимиз" дәп тәһдид селиватиду. Бир қисим кишиләр буниң билән, бейҗиңниң он йилдин буян йүргүзүп кәлгән хәлқ пулини америка доллириға бағлаштәк тегишиш түзүмини өзгәртишидин гуманлиниватиду. Бирақ, бундақ гуманлар бейҗиңниң қарар чиқириши үчүн пайдисиз - дегән.

Буниң алдида, бәзи мәлуматларда хитайниң 18 - май күни хәлқ пулиниң қиммитини қайта тәңшәйдиғанлиқи һәққидә хәвәрләр тилға елинған. Бу хәлқара ташқи перивот базирида чоң давалғушларни кәлтүрүп чиқарған иди.

Хитай һөкүмити нөвәттә бир долларни сәккиз йүән йигирмә фуң әтрапида тегишиштәк муқим тегишиш қиммити түзүмини йолға қоюп кәлгән болуп, бу америка вә яврупа бирликиниң қаттиқ наразилиқини қозғиған. Уларниң қаришичә, хитай бу хил түзүм арқилиқ ташқи содида нурғун мәнпәәт алмақта икән. (Арзу)