Xitay bölünüshke qarshi bir qanun yolgha qoymaqchi

Jüme küni xitay xelq qurultiyi da'imiy komitéti bölünüshke qarshi yéngi bir qanunni yolgha qoyidighanliqini jakarlidi. Siyasiy analizchilarning éytishiche, bu qanunning asasliq meqsidi teywenning resmiy musteqilliq élan qilishining aldini élish iken.

Shinxu'a agéntliqining bildürüshiche, bölünüp chiqishqa qarshi qanun layihisi xitay xelq qurultiyining 25 - we 29 - dikabir künliri arisida ötküzülidighan yighinida muzakire qilinidiken.

Shinxu'a agéntliqi xewiride, teywen mesilisi tilgha ilinmighinidek, qanunning némilerni öz ichige alghanliqi heqqidimu toxtalmighan.

Lékin xitay siyasiy mutexessislirining bildürüshiche, mezkur qanun teywenning musteqilliq élan qilishini qanunsiz bir heriketke aylandurup, xitay hökümitining qaysi shertler astida teywen'ge qarshi qoral ishlitishini mu'eyyenleshtüridiken.

Franisye axbarat agéntliqining xewer qilishiche, wuxendiki jiyanxen uniwersitétining proféssori yu yunjo, eger teywen bilen tinch birlishish mumkin bolmighan ehwal astida, chong quruqluq hökömitining herbiy küch ishlitish mesilisi qanun bilen belgilinishi kérek, digen.

Xitay hökümiti, eger teywen musteqilliq élan qilsa we ya chong quruqluq bilen qaytidin birlishish mesiliside dawamliq put tirejise, teywen'ge qarshi herbiy küch ishlitidighanliqini bildürüp, tehdid sélip kelmekte. (Qanat)