Сичүән соти қийин- қистақ арқилиқ еришкән җинайи пакитларни ишлитишни чәклиди


2005-04-15
Share

Хитайниң сичүән өлкилик алий сот мәһкимиси қарар чиқирип, қийин- қистақ вә алдаш қатарлиқ васитиләр арқилиқ еришкән җинайи пакитларни сотта испат қатарида ишлитишкә болмайдиғанлиқини бәлгилиди.

Америка бирләшмә ахбарат агентлиқиниң хәвиригә қариғанда, хитай сот мәһкимисиниң пәйшәнбә күни чиқарған бу қарари, хитай пуқраси йү шяңлинниң дилоси хәлқ арисида кәң ғулғула қозғиғандин кейин елан қилинған.

Хәвәргә қариғанда, йү шяңлин 10 күн қаттиқ қийин- қистаққа елинған әһвал астида, өзиниң аялини өлтүргәнликини " етирап" қилған. Буниң билән, йү шияңлин 1994 - йили " қатиллиқ җинайити" билән өлүм җазасиға һөкүм қилинип, кийин җазаси 15 йиллиқ қамақ җазасиға йәңгиллитилгән.

Бу йилниң башлири, йү шяңлинниң аяли туюқсиз қайта пәйда болғандин кийин, у ақлинип қоюп берилгән. Йү шяңлинниң наһәқ 11 йил түрмидә ятқанлиқи, хитайдики қийин- қистаққа елип мәҗбурий иқрар қилдуруш әһвалиниң еғирлиқини гәвдиләндүргән.

Кишилик һоқуқ тәшкилатлири, паалийәтчилири вә адвокатлар гәрчә сичүән алий сот мәһкимисиниң бу қарарини қарши алған болсиму, бирақ хитайниң қанун түзүлмисидә түпки өзгириш болмиғучә, бундақ қарарниң пәқәт символлуқ рол ойнайдиғанлиқини көрсәткән. Уларниң қаришичә, хитайда қийин- қистаққа елип мәҗбурий иқрар қилдуруш қанунсиз болсиму, әмма сақчилар вә башқа органларниң җинайәт гумандарлирини уруп, мәҗбурий иқрар қилдуридиған қилмишлири йәнила интайин еғир икән. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт