خىتايدا قار ئاپتى


2008-01-26
Share

خىتاينىڭ مەركىزى ۋە شەرقىي رايونلىرىدا قاتتىق قار يېغىشى ۋە ناچار ھاۋا شەرتلىرى تۈپەيلىدىن، شەنبە كۈنى قاتناش ئاساسەن توختىغان بولۇپ، چاغان ھارپىسىدا يولغا چىققان ئون مىڭلىغان كىشى يولدا قالغان.

خىتاي ئاخبارات ۋاسىتىلىرىنىڭ خەۋەر قىلىشىچە، بۇ قېتىمقى قار يېغىشى نۇرغۇنلىغان ئۆيلەرنىڭ ئۆرۈلۈپ چۈشۈشىگە ۋە زىرائەت مەھسۇلاتلىرىنىڭ بۇزۇلۇشىغا سەۋەب بولغان بولۇپ، مەيدانغا كەلگەن ئىقتىسادىي زىيان 6 مىليارد 230 مىليون يۈەنگە يەتكەن. ھەمدە ناچار ھاۋا تۈپەيلىدىن يۈزبەرگەن ماشىنا ھادىسىلىرىدە ئونلىغان ئادەم ئۆلگەن.

شىنخۇا ئاگېنتلىقىنىڭ خەۋەر قىلىشىچە، شەنبە كۈنى بېيجىڭ- گۇۋاڭجۇ پويىز يولى ئۈستىدىكى پويىز ئىستانسىلىرىدا قالغان يولوچىلار سانى 40 مىڭدىن ئاشقان. ئەنخۇي ئۆلكىسىدە بولسا، ھۆكۈمەت 12 مىڭ كىشىنى قار سەۋەبىدىن خەتەرلىك رايونلاردىن باشقا جايلارغا يۆتكىگەن. بېيجىڭ بىلەن گۇاڭدوڭ ئۆلكىسى ئوتتۇرىسىدىكى تاش يولدا قاتناش توختىغانلىقى تۈپەيلىدىن 60 مىڭ كىشى يولدا قالغان.

خەۋەردە ئېيتىلىشىچە، ھۆكۈمەت شاڭخەي قاتارلىق چوڭ شەھەرلەردە، يېمەكلىكلەرنىڭ نەرقىنىڭ ئۆرلەپ كېتىشىنىڭ ئالدىنى ئېلىش ئۈچۈن جىددىي تەدبىر ئېلىشقا باشلىغان.

خەۋەرلەرگە قارىغاندا، خىتاي ھۆكۈمەت دائىرىلىرى، ئۆتكەن يىلى 4.8 پىرسەنتكە يەتكەن پۇل پاخاللىقىنىڭ بۇ يىل قار ۋە ناچار ھاۋا شەرتلىرى سەۋەبىدىن تېخىمۇ ئۆرلەپ كېتىشىدىن ئەندىشە قىلماقتا. (ئۆمەر قانات)

پىكىرلەر (0)

بارلىق پىكىر - بايانلارنى كۆرۈش.

پىكىر قوشۇڭ

رادىئونىڭ ئىشلىتىش شەرتلىرىگە ئاساسەن، پىكىرلىرىڭىز تەكشۈرگۈچىلەر تەرىپىدىن تەستىقلىنىشى ۋە مۇۋاپىق دەرىجىدە تەھرىرلىنىشى تۈپەيلى، تور بەتتە دەرھال پەيدا بولمايدۇ. سىز قالدۇرغان مەزمۇنغا ئەركىن ئاسىيا رادىئوسى جاۋابكار بولمايدۇ. باشقىلارنىڭ كۆز قارىشى ۋە ھەقىقەتكە ھۆرمەت قىلىشىڭىزنى سورايمىز.

تولۇق بەت