Shenshidiki "qara xumdan" weqeside saqchi we yerlik emeldarlarning qoli bar


2007-06-22
Share

Tekshürgüchiler jüme küni shenshidiki qullar setchiliki "qara xumdan" weqeside saqchi we yerlik emeldarlarning qoli barliqini élan qildi. Shinxu'a axbarat agéntliqining xewer qilishiche, xitayning emgek we ijtima'iy kapalet ministirliqining mu'awin ministiri sün bawshuy, tekshürgüchilerning shenshidiki qanunsiz xumdanlarning tijaret pa'aliyitide yerlik emeldarlar we saqchilarning chétishliqi barliqini bayqighanliqini eskertip, munasiwetlik kishilerni hoquqidin paydilinip shexsi nepsige chogh tartish bilen eyibligen we "setchilikning intayin éghir derijide ikenlikini" bildürgen.

Sün bawshuyning jüme küni axbarat yighinida eskertishiche, tekshürgüchiler hazirgha qeder qara xumdanliqtin 359 kishini azad qilghan bolup, bu 12 neper ösmür bilen 65 neper nérwisidin adashqan kishilerni öz ichige alidiken. Saqchilar nöwette qarar xumdan weqesi bilen munasiwetlik 35 kishini qolgha aldi we yene 20 kishi üstidin tutush buyruqi chiqardi.

Shenshi ölkisining ölke bashliqi yüy yowjün, jüme küni weqe munasiwiti bilen ziyankeshlikke uchrighuchilardin epu sorighan. Yüy yowjün epu sorashtin 2 kün burun xitay bash ministiri wén jyabaw, dölet kabintining yighinida bu weqeni " bu bir qanunsiz qilmish bolupla qalmay , kishilerni görüge éliwélish we erkinliktin mehrum qilish weqesi" dep eyibligen idi.

Shinxu'a axbarat agéntliqi, shenshi ölkisi yungji rayonining emgek idarisidiki ikki emeldarning qolgha élin'ghanliqini xewer qildi. (Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet