Хубейда онмиңлиған хәлқ хваңши шәһәрлик һөкүмәтни қоршивалди


2005.08.09

Хоңкоңда чиқидиған винхүй гезитиниң хәвиригә асасланғанда, 6 - авғуст күни 30 миңдәк киши хубей өлкиси хваңши шәһириниң һөкүмәт бинасини қоршивалған. Һөкүмәт даирилири сақчиларни йөткәп мудахилә қилиш җәрянида, бөрә итларни ишқа селип тәләп сунғучиларни талатқандин кейин, хәлқ аммиси қаттиқ ғәзәплинип, икки тәрәп арисида тоқунуш йүз бәргән.

Б б с агентлиқиниң мәлум қилишичә, дайи шәһириниң нәччә онмиң аһалиси шәһәрниң дәриҗисини төвәнлитип, районға өзгәртиш пиланиға қарши наразилиқ билдүрүп, хваңши шәһәрлик һөкүмәт бинаси алдиға топлишип коллектип һәрикәт елип берип, һөкүмәтни мәзкур пиланини вақитлиқ тохтитишқа мәҗбур қилған.

Әслидә, бу вәқә 4 - авғуст күни башланған болуп, хваңши шәһәрлик һөкүмәт өз тәвәсидики наһийә дәриҗилик дайи шәһирини бикар қилип, районға өзгәртип өзигә қошувалған.

Нарази болған 200 гә йеқин дайи шәһәр аһалиси хваңши шәһириниң һөкүмәт бинаси алдиға келип тәләп сунған. Сақчилар аммини қоршап, итқа талатқан һәмдә яш аққузидиған бомбиларни етип тарқитивәткән. Ғәзәпләнгән амма шу күни кечидә тор бетидә баянат елан қилип, шәһәр хәлқини һөкүмәт бинасини қоршивилишқа чақирған.

Хәлқ гезитиниң хәвиригә қариғанда, намайишчилар әтисидин башлап улғийип, нәччә онмиңға йәткән. Улар һөкүмәт бинасиниң дәризилирини таш етип чиқивәткән. Вухәнгә баридиған тиз сүрәтлик аптомобил йолини игиливалған. Нәтиҗидә һөкүмәт қарарини вақитлиқ тохтитишқа мәҗбур болған.

Вашингтон почтиси гезити 1 - авғуст күни елан қилған мақалисидә, хитай коммунистик партийиси һөкүмранлири, иҗтимаий муқимлиқ иқтисади тәрәққиятни илгири сүрүшниң муқәррәр алдинқи шәрти дәп тәкитләватқан болсиму, әгәр хәлқ қозғалғандин кейин бесиқтуралмиса, өзлириниң һоқуқини йоқитип қоюши мумкинликини яхши билиду, дәп көрсәткән иди. (Илтәбир)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.