Xubéyda onminglighan xelq xwangshi sheherlik hökümetni qorshiwaldi


2005-08-09
Share

Xongkongda chiqidighan winxüy gézitining xewirige asaslan'ghanda, 6 - awghust küni 30 mingdek kishi xubéy ölkisi xwangshi shehirining hökümet binasini qorshiwalghan. Hökümet da'iriliri saqchilarni yötkep mudaxile qilish jeryanida, böre itlarni ishqa sélip telep sun'ghuchilarni talatqandin kéyin, xelq ammisi qattiq ghezeplinip, ikki terep arisida toqunush yüz bergen.

B b s agéntliqining melum qilishiche, dayi shehirining nechche onming ahalisi sheherning derijisini töwenlitip, rayon'gha özgertish pilanigha qarshi naraziliq bildürüp, xwangshi sheherlik hökümet binasi aldigha topliship kolléktip heriket élip bérip, hökümetni mezkur pilanini waqitliq toxtitishqa mejbur qilghan.

Eslide, bu weqe 4 - awghust küni bashlan'ghan bolup, xwangshi sheherlik hökümet öz tewesidiki nahiye derijilik dayi shehirini bikar qilip, rayon'gha özgertip özige qoshuwalghan.

Narazi bolghan 200 ge yéqin dayi sheher ahalisi xwangshi shehirining hökümet binasi aldigha kélip telep sun'ghan. Saqchilar ammini qorshap, itqa talatqan hemde yash aqquzidighan bombilarni étip tarqitiwetken. Ghezeplen'gen amma shu küni kéchide tor bétide bayanat élan qilip, sheher xelqini hökümet binasini qorshiwilishqa chaqirghan.

Xelq gézitining xewirige qarighanda, namayishchilar etisidin bashlap ulghiyip, nechche onminggha yetken. Ular hökümet binasining derizilirini tash étip chiqiwetken. Wuxen'ge baridighan tiz sür'etlik aptomobil yolini igiliwalghan. Netijide hökümet qararini waqitliq toxtitishqa mejbur bolghan.

Washin'gton pochtisi géziti 1 - awghust küni élan qilghan maqaliside, xitay kommunistik partiyisi hökümranliri, ijtima'iy muqimliq iqtisadi tereqqiyatni ilgiri sürüshning muqerrer aldinqi sherti dep tekitlewatqan bolsimu, eger xelq qozghalghandin kéyin bésiqturalmisa, özlirining hoquqini yoqitip qoyushi mumkinlikini yaxshi bilidu, dep körsetken idi. (Iltebir)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet