Қирғизистан хитай бирликтә шәрқий түркистан күчлиригә зәрбә беришкә пүтүшти

Хитайниң шинхуа агентлиқиниң учуридин ашкарилинишичә, қирғизистан президенти қурманбек бақийев хитайдики икки күнлүк зияритини ахирлаштурди. 9 - Июн күни хитайға йетип кәлгән қурманбек бақийев хитай рәиси ху җинтав вә баш министир вен җйбав қатарлиқлар билән сөһбәт өткүзүп, хитай билән қирғизистан сиясий, иқтисадий вә мәдәнийәт мунасивәтлирини техиму чоңқурлаштурушта пикир бирлики һасил қилди. Ахирида, хитай вә қирғизистан дөләт башлиқлири бирләшмә баянат елан қилди. Уларниң бирләшмә баянатиниң мәзмун даириси кәң болуп, униңда қирғизистан билән хитайниң "шәрқий түркистан күчлиригә бирликтә зәрбә беридиғанлиқи", "шәрқий түркистан күчлиригә зәрбә беришни хәлқара террорчилиққа зәрбә беришниң бир қисими дәп қарайдиғанлиқи" билдүрүлгән. Мәзкур бирләшмә баянатта йәнә: җуңго билән қирғизистанниң бихәтәрлик һәмкарлиқлирини күчәйтип, "шәрқий түркистанни" оз ичигә алған " үч хил күчләр вә чегра һалқиған җинайәтчиликкә ортақ зәрбә бериду" дәп көрситилгән.

Униңдин башқа йәнә хитай-қирғиз бирләшмә баянатида "икки тәрәпниң бир-бириниң тупрақлирида бир-бириниң дөләт бихәтәрлики, игилик һоқуқи вә земин пүтүнликигә тәһдид салидиған тәшкилат вә җәмийәтләрни қурушқа рухсәт қилмаслиқ "дегән маддиму йәр алған.

Қурманбек бақийев әсқәр ақайевниң хитай сияситини давамлаштуруп, уйғур мәсилисидә хитай билән ортақ мәйданини ипадә қилған.(Үмидвар)