Xitay qiynap iqrar qildurushni chekleydighan yéngi belgilime chiqardi

Junggo da'iriliri tutqunlarni qiynap iqrar qildurushni chekleydighan yéngi belgilime chiqirip, buninggha xilapliq qilghan edliye xadimlirining jinayi jawabkarliqi sürüshtürülidighanliqini élan qildi.

Shinxu'a axbarat agéntliqining xewer qilishiche,junggo aliy teptish mehkimisi chiqarghan "jinayi dilolarda hoquqini qalaymiqan qollan'ghanlar üstidin dilo turghuzushning ölchimi heqqidiki belgimisi"de, tunji qétim dilo turghuzulidighan weqelerning ölchimini tepsiliy chüshendürgen. Yéngi belgilimide bu jinayetni " edliye xadimlirining jinayet gumandari we eyiblen'güchige ten jazasi bérish yaki shekli özgergen usullar bilen ten jazasi bérish qilmishidur " deydu.

Shinxu'a axbarat agéntliqining eskertishiche, saqchilar gumandarlarni ursa, baghlisa, qiynash üskünilirini qanunsiz ishletse yaki ach qoyush, muzlitish, aptapqa qaqlash we kishen sélish qatarliq usullar bilen iqrar qildurup, gumandarlarning salametlikigeziyan yetküzse we ölüshini keltürüp chiqarsa jinayi jawabkarliqqa tartilidiken.

Aliy teptish mehkimisining mu'awin bash teptishi wash jénchüen, "bu belgilime kishilik hoquqni téximu körinerlik derijide kapaletke ige qilidu " deydu. Xelq'ara kishilik hoquq teshkilatliri xitay da'irilirini mehbuslargha ten jazasi bermekte we gumandarlarni qiynap iqrar qildurmaqta, dep eyiblep keldi.

B d t kishilik hoquq komitétitining ten jazasini tekshürüsh emeldari manfrid nowak, bu yil 3 - ayda élan qilghan junggoni tekshürüsh doklatida " junggo edliye tüzümi iqrar qildurushni asas qilghan " dep eyibligen idi. U, bolupmu tibet we Uyghur mehbuslirigha omumyüzlik ten jazasi bérilidighanliqini tekitligen. (Erkin)