Yaponiye xitaydiki 2 - dunya urushida qélip qalghan ximiyilik qorallarni tazilaydu

Yaponiye hökümiti 2 - dunya urushi jeryanida yaponiye armiyisi xitayda qaldurup qoyghan ximiyilik qorallarni tazilash eslihesi qurushqa 2 milyard 800 milyon dollar ajratti.

Fransiye axbarat agéntliqining xewer qilishiche, yaponiye xitay hökümiti bilen bu yil 4 - ayda ximiyilik qorallarni tazilash mesililiri boyiche kélishim tüzgen. Kélishimge asasen yaponiye hökümiti bir yil ichide xitayda ximiyilik qorallarni bir terep qilish eslihelirini qurup chiqip, 2007 - yilghiche yaponiye armiyisi xitayda qaldurup ketken barliq ximiyilik qorallarni yoqitidu.

Yaponiye terepning perez qilishiche yaponiye armiyisi qaldurup ketken xitaydiki ximiyilik qorallarning sani 7 ming etrapida bolushi mumkin. Xitay terep bolsa bu sanning 2 milyondin ashidighanliqini ilgiri sürmekte. Ötken yili xitayning xéylongjiyang ölkisidiki chichixar shehiride yaponiye armiyisi öz waqtida qaldurup ketken ximiyilik qollardin xitay puqralirining zeherlinish weqesi yüz bérip, bir adem ölgen 40 dek adem yarilan'ghanidi.(Erkin)