Җисманий хорлуққа учриған "қул ишчилар" ниң сани 53 миңға йәткән


2007.06.25

Хитай ахбарат васитилириниң хәвәр қилишичә, хитайдики қуллуққа тутулуш сәтчилики ашкариланғандин башлап һазирға қәдәр, көмүркан вә хумданлардин қутулдурулған җисманий хорлуққа учриған "қул ишчилар" ниң сани 53 миңға йәткән.

Франсийә агентлиқиниң хитай мәтбуатлиридин нәқил кәлтүрүшичә, шәнши өлкилик хәлқ қурултийи вәкили фән дүйшяң , тәкшүргүчиләрниң 3 миңдин артуқ ширкәт ‏- завутларниң икки миңдин көпрәкиниң қануний рәсмийити йоқ икәнликини,уларниң 53 миң нәпәр аққун ишчиларни ишләткәнликини байқиғанлиқини, билдүргән.

Мәлум болушичә, хитай хәлқ қурултийи хитайдики "қул ишчилар" сәтчиликиниң қайта йүз берип қелишиниң алдини елиш үчүн йеңидин бир қанун лайиһиси мақуллайдикән.

Хитай ахбарат авазлириниң хәвиригә қариғанда, "қул ишчилар" сәтчиликигә сода-санаәт, әмгәк вә сақчи тармақлиридики нурғун әмәлдарлар четилип қалған. Униңдин башқа йәнә, хенән өлкисидә әмгәк йешиға тошмиған өсмүрләрни өз ичигә алған 600 адәм "қуллуқтин" азад қилинған.

Алдинқи һәптә радиомиз игилигән мәлуматларға қариғанда, қара хумдандин қутулдуруп чиқилғанларниң арисида, адил исимлик бир уйғурниң барлиқи ашкариланған болуп, һазирға қәдәр униң кейинки әһвали һәққидә тәпсилий мәлумат елишқа теришип келиватимиз.(Җүмә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.