Хитай җяңсудики қуш зукам вирусида юқумлиниш вәқәсиниң адәмдин ‏- адәмгә юққанлиқини иқрар қилди


2008-01-11
Share

Хитай сәһийә даирилири алдинқи күни өткән йили 12 - айда байқалған җяңсу өлкисидики бир аилидә ата - балиниң қуш зукам вируси билән юқумлиниш вәқәсидә, вирусниң балидин ‏атиға юққанлиқини иқрар қилди. Лекин вирусниң адәмдин ‏- адәмгә юқидиған биологийилик өзгириш һасил қилғанлиқини испатлайдиған илмий пакит тепилмиғанлиқини әскәртти.

Хитай сәһийә министирлиқиниң баянатчиси мав чүнәнниң әскәртишичә, мутәхәссисләр бу аилидә вирусниң балидин атиға тарқалғанлиқи тоғрисида дәсләпки һөкүмгә игә болған. Лекин у, вирусниң биологийилик өзгириш ясиғанлиқиға аит пакит йоқлуқини әскәртти. Өткән йили 12 - айда хитайниң җяңсу өлкисидә 24 яшлардики бир яшниң H5N1 типлиқ қуш зукам вирусида юқумланғанлиқи испатланған болуп, бу яш шу чағниң өзидә өлгән, лекин бу яшниң дадиси бир мәзгил дохтурханида йетип чиққан.

Әйни чағда даириләр лу пәмилилик бу аилидә вирусниң дадиға оғлидин юққанлиқини рәт қилған иди. Хитай сәһийә министирлиқиниң баянатчиси алдинқи күни бу вәқәдә вирус юқтурувалған ата - балиниң өй қушлириға йеқинлашмиғанлиқини, уларниң вирусни зади қәйәрдин юқтурувалғанлиқи йәнила ениқланмиғанлиқини билдүрди.

Хитай даирилири йеқинда уйғур аптоном райониниң турпан шәһиридә қуш зукам вируси байқалғанлиқини етирап қилған. Хитай дөләтлик қуш зукам тәҗрибиханиси 3 - январ күни турпан идиқут йоли иш башқармисида байқалған вирусниң H5N1 типлиқ зукам вируси икәнликини елан қилған. Йәрлик даириләр болса вирус байқалған районни дизинпиксийә қилиш, тоху базирини тақаш вә вәқә йүз бәргән райондики өй қушлирини өлтүрүш, өй қушлириға йеқинлашқан адәмләрни тәкшүрүш һәрикити елип барған, лекин адәмләрдә юқумлиниш әһвали байқалмиғанлиқини тәкитлигән иди. (Әркин)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт