Хитайда қуш зукам вируси тунҗи қетим чошқида байқалди

Хитай мутәхәссислири қуш зукам вирусиниң тунҗи қетим хитайдики чошқиларда байқалғанлиқини ашкарилиди.

Харбиндики хитай дөләтлик зукам вируси тәҗрибиханисиниң мәсул хадими чен хуалән , қуш зуками вә сарс кесили тоғрисидики бир қетимлиқ хәлқара йиғинда сөз қилип , хитайда елип берилған тәҗрибиләр нәтиҗисидә қуш зукаминиң чошқида байқалғанлиқини елан қилған. Тәҗрибиниң 2003 вә 2004 - йиллири елип берилғанлиқини билдүргән чен хуалән , бу һәқтики тәтқиқатлар үстидә илгириләп тохталмиди . У бу һәқтики мәлуматларни бейҗиңда өткүзүлгән илмий йиғинда җакарлиған . Хитай даирлири болса һазирғичә қанчилик чошқиниң қуш зукамидин юқумланғанлиқи тоғрисида һечқандақ мәлумат елан қилмиған.

Чен хуаләнниң мәлуматидин қаттиқ әндишигә чүшкәнликини билдүргән хәлқара сәһийә тәшкилати , қуш зукаминиң тунҗи чошқида байқалғанлиқи тоғрисида мәлумат алғанлиқини , бирақ бу һәқтә техиму көп мәлуматқа еһтияҗлиқ икәнликини тәкитлимәктә. Сәһийә тәшкилатиниң баянатчиси , қуш зукаминиң омуми йүзлүк тарқилиш еһтималлиқидин қайғуриватқанлиқини илгири сүргән. Һазирғичә қуш зукаминиң чошқиға қандақ юққанлиқи техи ениқ әмәс. Мутәхәссисләрниң билдүрүшичә , чошқилар һәм қуш зуками һәм адәмдики зукам вируслирини өзидә елип йүрүш җәрянида , зукам вирусиниң техиму хәтәрлик түрлирини пәйда қилиши мүмкин икән.(Әркин)