Xitayda qush zukam wirusi tunji qétim choshqida bayqaldi


2004-08-20
Share

Xitay mutexessisliri qush zukam wirusining tunji qétim xitaydiki choshqilarda bayqalghanliqini ashkarilidi.

Xarbindiki xitay döletlik zukam wirusi tejribixanisining mes'ul xadimi chén xu'alen , qush zukami we sars késili toghrisidiki bir qétimliq xelq'ara yighinda söz qilip , xitayda élip bérilghan tejribiler netijiside qush zukamining choshqida bayqalghanliqini élan qilghan. Tejribining 2003 we 2004 - yilliri élip bérilghanliqini bildürgen chén xu'alen , bu heqtiki tetqiqatlar üstide ilgirilep toxtalmidi . U bu heqtiki melumatlarni béyjingda ötküzülgen ilmiy yighinda jakarlighan . Xitay da'irliri bolsa hazirghiche qanchilik choshqining qush zukamidin yuqumlan'ghanliqi toghrisida héchqandaq melumat élan qilmighan.

Chén xu'alenning melumatidin qattiq endishige chüshkenlikini bildürgen xelq'ara sehiye teshkilati , qush zukamining tunji choshqida bayqalghanliqi toghrisida melumat alghanliqini , biraq bu heqte téximu köp melumatqa éhtiyajliq ikenlikini tekitlimekte. Sehiye teshkilatining bayanatchisi , qush zukamining omumi yüzlük tarqilish éhtimalliqidin qayghuriwatqanliqini ilgiri sürgen. Hazirghiche qush zukamining choshqigha qandaq yuqqanliqi téxi éniq emes. Mutexessislerning bildürüshiche , choshqilar hem qush zukami hem ademdiki zukam wiruslirini özide élip yürüsh jeryanida , zukam wirusining téximu xeterlik türlirini peyda qilishi mümkin iken.(Erkin)

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet