‎ Dunya sehiye teshkilati xitaydiki qush zukimi wirusining tarqilish ehwalidin endishe ‎qilmaqta

Dunya sehiye teshkilati peyshenbe küni xitaydiki qush zukimining tarqilish ehwalidin ‎endishe qiliwatqanliqini ipadilidi. Charshenbe küni xitay hökümiti ichki mongghulning ‎kökxot shehiri etrapidiki bir férmida ‎H5N1 tipliq qush zukimi wirusi bayqalghanliqini ‎we bu sewebtin 2600 din artuq öy qushining ölgenlikini étirap qilghan idi. ‎

Dunya sehiye teshkilatining béyjingdiki bayanatchisi, "biz bu ishqa intayin köngül ‎bölüwatimiz. Chünki her qandaq yéngi jayda, yéngi késellik ehwallirining bayqilishi, ‎ademlerning yuqumlinish éhtimalliqini köpeytidu" dédi. ‎

‎ Xitay déhqanchiliq ministirliqining dunya sehiye teshkilatigha melum qilishiche, ‎hazirghiche xitay da'iriliri kökxot shehiri etrapida taralghan qush zukimining ‎tarqilishining aldini élish üchün 90 mingdin artuq öy qushini öltürgen. ‎

Xitay sehiye ministirliqi gerche ilgiri késellik ehwali heqqidiki uchurlarni ochuq- ashkara ‎élan qilidighanliqini bildürgen bolsimu, ichki mongghuldiki sehiye we yéza- igilik ‎da'iriliri bu heqtiki ziyaretlerni qobul qilishni ret qilmaqta. ‎

‎ Bu arida, teywen chégra mudapi'e idarisining bildürüshiche, teywen da'iriliri yéqinda ‎qolgha chüshürgen xitaydin etkes qilin'ghan öy qushliri arisidimu ‎ H5N1 ‎ tipliq qush ‎zukimi wirusini bayqighan. ‎

‎ Rusiyide bolsa, moskwa shehiri etrapidiki bir rayonda qush zukimi wirusi ‎bayqalghandin kéyin, moskwa sheher bashliqi xelqni chöchüp ketmeslikke chaqirdi ‎hemde peyshenbe künidin bashlap, jiddiy tedbir qollinip, bu rayondiki toxu, ördek, ghaz ‎qatarliq öy qushliri göshlirining bazargha sélinishini qet'iy chekleydighanliqini bildürdi. ‎‎(Arzu)‎