Xitay qush zukimi bilen adem ölgenlikini inkar qildi

Qush zukimi wirusi tarqalghan xitayning xunen ölkisi shiyangten nahiyiside bir qizning késel tekken toxu göshi yigendin kéyin ölüp ketkenliki melum boldi. Emma xitay hökümiti bu qizning qush zukimi bilen emes, belki öpke késili bilen ölgenlikini bildürdi.

Chet'el metbu'atlirining xewer qilishiche, xénen shiyangten nahiyisining wentang yézisida aldinqi küni H5N1 tipliq qush zukimi wirosi bayqilip, pütün yéza qamal qilin'ghan. Mezkur yézidiki bir déhqanning yigirmidin artuq toxu ödiki ölüp ketken bolup, ularning qush zukimi bilen ölgenliki guman qilin'ghan. Bu déhqanning oghli we qizi kisel tégip ölgen toxu göshini yigendin kéyin témpératurisi örlep, zukam alametliri körülgen bolup, 12 yashliq qizi changsha doxturxanisida dawalash ünüm bermey ölüp ketken.

Xunen ölkilik hökümet da'iriliri, bu ikki balini tekshürgenlikini, ularning qush zukimi bilen yuqumlanmighanliqini bildürdi hemde shiyangten nahiyiside peqet qushlarningla qush zukimi bilen yuqumlan'ghanliqini, ademlerge yuqush ehwallirining körülmigenlikini körsetti.

Bu arida, birleshken döletler teshkilati, ularning hazirche xitayda ademning qush zukumi wirusini yuqturwalghanliqi heqqidiki melumatlarni tapshurup almighanliqini, mezkur teshkilatning xitay sehiye ministirliqi bilen alaqiliship, eng ishenchlik melumatlargha érishishni ümid qilidighanliqini bildürdi. (Arzu)