Xitayda ademlerning qush zukam wirusi bilen yuqumlinish weqesidin yene biri bayqaldi

Xitay da'iriliri peyshenbe küni xitayning lyawning ölkisi xéyshen nahiyiside 31 yashlardiki bir ayalning ölük qushlar bilen uchrashqandin kéyin qush zukam wirusi bilen yuqumlan'ghanliqi bayqalghanliqini élan qildi. Bu xitayda qush zukam wirusidin ademler yuqumlinish weqesining 5 - qétim bayqilishidur.

Shinxu'a axbarat agéntliqi peyshenbe künki xewiride "sehiye ministirliqi lyawning ölkisi xéyshen nahiyiside namelum sewebler tüpeylidin öpke yallughi bilen aghrighan bir ayalning h5n1 tipliq qush zukam wirusi yuqturuwalghanliqidin xewer tapti" dep yazghan.

Xitayda hazirghiche ikki adem qush zukam wirusi yuqturuwalghanliqi sewebidin öldi. Xitay hökümiti 2003 - yili xitayda sars wirusi tarqilish weqesidin kéyin, yuqumluq késellerni yoshurmay élan qilidighanliqini jakarlighan.

Xitay boyiche qush zukam wirusi hazirgha qeder 31 yerde bayqaldi. Buning üchtin bir qisimi Uyghur aptonom rayonida bolup, yerlik da'iriler ötken düshenbe küni Uyghur aptonom rayonining poskam nahiyisidiki qush zukam wirusi bayqalghan jayda közitish élip bérish we qamal qilishni bikar qilghan.

Xitay da'iriliri Uyghur aptonom rayonida bayqalghan qush zukam wirusi weqelirini keng - kölemde xewer qilishtin özini qachurmaqta. (Erkin)