Хитайда қуш зукам вируси билән юқумланған 6 - киши байқалди


2005.12.16
Share on WhatsApp
Share on WhatsApp

Хитай мәтбуатлириниң җүмә күни хәвәр қилишичә, хитайда җяңши өлкиси сүйчүән наһийисиниң бир йезисидики ғазларда қуш зукам вируси байқалғанлиқи мәлум қилинғандин кейин, мәзкур йезида 35 яшлардики бир хитай пуқрасиниң қуш зукам вируси билән юқумланғанлиқи байқалди.

Бу һазирғичә хитайда адәмләр қуш зукам вируси билән юқумлиниш вәқәсиниң 6 - қетим йүз бериши болуп һесаблиниду. Өткән айда әнхуйлуқ икки хитай пуқрасиму мәзкур вирусни юқтурувалғанлиқи сәвәбидин өлгән. Лявниң, хунән вә гуаңши қатарлиқ җайларда адәмләрниң мәзкур зукам вируси билән юқумлиниш вәқәлири йүз бәргән иди.

Шинхуа ахбарат агентлиқи җяңшида байқалған кесәллик тоғрисида тәпсили учурлар билән тәминлимигән болсиму, әмма қуш зукам вируси юқтурувалған киши билән йеқин алақә қилған 91 кишиниң көзитиш астиға елинғанлиқини хәвәр қилди.

Хитай даирилири өткән һәптә хитай бойичә қуш вируси әң көп байқалған уйғур аптоном районида, назарәт вә тәкшүрүш тәдбирлириниң бикар қилинғанлиқини елан қилған. Даириләрниң әскәртишичә, қуш зукам вируси ахирқи қетим күнәсниң бәш төпә йезисида байқалғандин бери, уйғур аптоном районида зукам вируси һазирғичә қайта байқалмиди. Әмма йеқинда хоңкоң мәтбуатлири хитай даирилирини қуш зукам вируси вәқәлирини йәнә йошуруш билән әйиблигән болсиму, әмма хитай ташқи ишлар министирлиқи бу хил әйибләшләрни рәт қилған.

Шинхуа ахбарат агентлиқиниң хәвәр қилишичә, йәрлик даириләр җяңшидики зукам вируси байқалған йезиниң кириш‏- чиқиш еғизлирида тәкшүрүш понкитлирини қуруп, йезиға кирип - чиққан пуқралар вә қатнаш әслиһәлирини тәкшүрмәктикән. Хитай йеза игилик министирлиқиниң баш мал дохтури җя йолиң, қуш зукам вирусиниң чаған мәзгилидә қайта партлаш еһтимали зор, дәп агаһландурған. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.