Xitayda qush zukam wirusi bilen yuqumlan'ghan 6 - kishi bayqaldi

Xitay metbu'atlirining jüme küni xewer qilishiche, xitayda jyangshi ölkisi süychü'en nahiyisining bir yézisidiki ghazlarda qush zukam wirusi bayqalghanliqi melum qilin'ghandin kéyin, mezkur yézida 35 yashlardiki bir xitay puqrasining qush zukam wirusi bilen yuqumlan'ghanliqi bayqaldi.

Bu hazirghiche xitayda ademler qush zukam wirusi bilen yuqumlinish weqesining 6 - qétim yüz bérishi bolup hésablinidu. Ötken ayda enxuyluq ikki xitay puqrasimu mezkur wirusni yuqturuwalghanliqi sewebidin ölgen. Lyawning, xunen we gu'angshi qatarliq jaylarda ademlerning mezkur zukam wirusi bilen yuqumlinish weqeliri yüz bergen idi.

Shinxu'a axbarat agéntliqi jyangshida bayqalghan késellik toghrisida tepsili uchurlar bilen teminlimigen bolsimu, emma qush zukam wirusi yuqturuwalghan kishi bilen yéqin alaqe qilghan 91 kishining közitish astigha élin'ghanliqini xewer qildi.

Xitay da'iriliri ötken hepte xitay boyiche qush wirusi eng köp bayqalghan Uyghur aptonom rayonida, nazaret we tekshürüsh tedbirlirining bikar qilin'ghanliqini élan qilghan. Da'irilerning eskertishiche, qush zukam wirusi axirqi qétim künesning besh töpe yézisida bayqalghandin béri, Uyghur aptonom rayonida zukam wirusi hazirghiche qayta bayqalmidi. Emma yéqinda xongkong metbu'atliri xitay da'irilirini qush zukam wirusi weqelirini yene yoshurush bilen eyibligen bolsimu, emma xitay tashqi ishlar ministirliqi bu xil eyibleshlerni ret qilghan.

Shinxu'a axbarat agéntliqining xewer qilishiche, yerlik da'iriler jyangshidiki zukam wirusi bayqalghan yézining kirish‏- chiqish éghizlirida tekshürüsh ponkitlirini qurup, yézigha kirip - chiqqan puqralar we qatnash eslihelirini tekshürmektiken. Xitay yéza igilik ministirliqining bash mal doxturi jya yoling, qush zukam wirusining chaghan mezgilide qayta partlash éhtimali zor, dep agahlandurghan. (Erkin)