Xitayda yene qush zukimi bimari bayqaldi

Xitay sehiye ministirliqi 23 ‏- yanwar küni sichü'en ölkisi jinxu'a shehiride 29 yashtiki saw famililik bir ayalda qush zukimi wirusi bayqalghanliqini jakarlidi.

Saw xitayda qush zukimi késellikige giriptar bolghan 10‏- kishi hésablinidu. Sichü'ende bu ay ichide yene bir ayal qush zukimi késellikige giriptar bolup, 11‏- yanwar küni qaza qilghan idi.

Roytris agéntliqining xewer qilishiche, saw 12‏-yanwar küni qizitmisi örlep ketkenliki üchün doxturxanigha yatquzulghan bolup,tekshürüshler netijiside uning qush zukimigha giriptar bolghanliqi éniqlan'ghan. Hazirghiche, xitayda qush zukimi késellikige giriptar bolghanliqi éniqlan'ghan 10 kishining 6 si qaza qildi.

Qush zukimi késellikige qarshi pa'aliyet élip bériwatqan xitay emeldarliri,aldimizdiki heptilerde xitay yéngi yilining kélishi bilen xitay yene qush zukimi késelliki tehditige uchrishi mumkin dep agahlandurmaqta.

Xitayning mu'awin bash ministiri xüy liyangyü qush zukimi mutexessisliri yighinida qilghan sözide, yéngi yilda nurghun kishiler sayahetke chiqidu hemde en'ene boyiche toxu we qush göshi yeydu. Shunga bu qush zukimi köprek bayqilidighan bir pesil hésablinidu, dédi. (Qanat)