Хитайда қуш зукам вируси билән юқумланған бир аял өлди

Бейҗиң даирилириниң җүмә күни елан қилишичә, хитайда қуш зукам вируси билән юқумланған бир аял мәзкур вирус сәвәбидин өлди. Буниң билән хитайда қуш зукам вирусида өлгән кишиләрниң сани 8 гә йәткән.

Хитай сәһийә министирлиқиниң әскәртишичә, қуш зукам вируси вәқә йүз бәргән районда яшайдиған қушларда байқалмиған. Дуня сәһийә тәшкилати қуш зукам вирусиниң адәм бәдинидә химийилик өзгириш ясап, адәмдин‏- адәмгә юқидиған бир хил вирус типиға айлинишидин әнсиримәктә иди. Әмма хитай даирилири, мутәхәссисләрниң өлгүчи зукам вирусини өлгән өй қушлиридин юқтурувалған болуши мүмкин, дәп гуман қиливатқанлиқини билдүрди.

Қуш зукам вирусида бу қетим өлгән хитай пуқраси 20 яшлардики бир қиз болуп, у хунәнниң сүйниң кәнтидә яшайдиған бир деһқан икән. Хитайниң қуш зукам вируси тәҗрибиханиси, өлгүчиниң H5N1 типлиқ қуш зукам вирусида юқумланғанлиқини испатлиди. Өлгүчи қизда 1 - айниң 27 - күни кесәллик аламәтлири байқалғандин кейин , у 2 - айниң 4 - күни өлгән. Бу хитайда мушу бир һәптә ичидә зукам вируси сәвәбидин өлгән 2- адәм болуп һесаблиниду.

Бейҗиң даирилири өткән чаршәнбә хитайда 26 яшлиқ бир аялниң мәзкур вирус сәвәбидин өлгәнликини җакарлиған. Әмма өлгүчи яшайдиған райондики қушларда зукам вируси байқалмиған иди. Хитай йеза игилик министирлиқиниң баянатчиси мав чүнән, сүйниң наһийисидә өлгән қиз һәққидә тохтулуп, " мутәхәссисләрниң анализ қилишичә, бу вәқәгә өлгүчиниң зукам вирусини әтрапдики өлгән тохулардин юқтурувалғанлиқи сәвәбчи болған "дәйду. Әмма у, бу вәқә тоғрисида һазирчә вирусниң тарқилиш қаналлириға даир тәпсили учурға игә әмәсликини билдүрди.

Өткән йили -10 айдин бери , хитай бойичә 12 йәрдә қуш зукам вируси байқалди. Сәншиниң яңчүән наһийисидә 35 нәпәр деһқан карантин астиға елинған. (Әркин)