Xitayda qush zukam wirusi bilen yuqumlan'ghan bir ayal öldi

Béyjing da'irilirining jüme küni élan qilishiche, xitayda qush zukam wirusi bilen yuqumlan'ghan bir ayal mezkur wirus sewebidin öldi. Buning bilen xitayda qush zukam wirusida ölgen kishilerning sani 8 ge yetken.

Xitay sehiye ministirliqining eskertishiche, qush zukam wirusi weqe yüz bergen rayonda yashaydighan qushlarda bayqalmighan. Dunya sehiye teshkilati qush zukam wirusining adem bedinide ximiyilik özgirish yasap, ademdin‏- ademge yuqidighan bir xil wirus tipigha aylinishidin ensirimekte idi. Emma xitay da'iriliri, mutexessislerning ölgüchi zukam wirusini ölgen öy qushliridin yuqturuwalghan bolushi mümkin, dep guman qiliwatqanliqini bildürdi.

Qush zukam wirusida bu qétim ölgen xitay puqrasi 20 yashlardiki bir qiz bolup, u xunenning süyning kentide yashaydighan bir déhqan iken. Xitayning qush zukam wirusi tejribixanisi, ölgüchining H5N1 tipliq qush zukam wirusida yuqumlan'ghanliqini ispatlidi. Ölgüchi qizda 1 - ayning 27 - küni késellik alametliri bayqalghandin kéyin , u 2 - ayning 4 - küni ölgen. Bu xitayda mushu bir hepte ichide zukam wirusi sewebidin ölgen 2- adem bolup hésablinidu.

Béyjing da'iriliri ötken charshenbe xitayda 26 yashliq bir ayalning mezkur wirus sewebidin ölgenlikini jakarlighan. Emma ölgüchi yashaydighan rayondiki qushlarda zukam wirusi bayqalmighan idi. Xitay yéza igilik ministirliqining bayanatchisi maw chün'en, süyning nahiyiside ölgen qiz heqqide toxtulup, " mutexessislerning analiz qilishiche, bu weqege ölgüchining zukam wirusini etrapdiki ölgen toxulardin yuqturuwalghanliqi sewebchi bolghan "deydu. Emma u, bu weqe toghrisida hazirche wirusning tarqilish qanallirigha da'ir tepsili uchurgha ige emeslikini bildürdi.

Ötken yili -10 aydin béri , xitay boyiche 12 yerde qush zukam wirusi bayqaldi. Senshining yangchüen nahiyiside 35 neper déhqan karantin astigha élin'ghan. (Erkin)