Xitay qush zukam ehwali kishini endishe salmaqta

Gerche xitay hökümiti xitayda qush zukam késilining tarqilishini ünümlük kontrol qilip bolghanliqini éytqan bolsimu, lékin bu bir aydin buyan xitayda bir qanche kishining qush zukimi bilen qaza qilishi kishilerning xitay hökümitining bu heqtiki bayanigha bolghan gumanini qozghidi.

En'gliye b b s radi'o-téléwiziye shirkitining xewer qilishiche, bir qisim analizchilar xitay hökümitini heqiqiy ehwalni bilsimu, qesten doklat qilmighan bolushi mumkin dep qarighan. Ular hetta xitay hökümitining qush zukimi ehwalining tarqilishigha bolghan tekshürüshining yéterlik bolmighanliqini körsetken .

Xitay da'iriliri ötken yili qush zukimining tarqilishini kontrol qilish üchün bir yürüsh tedbirlerni qollinip, uning aldini yaxshi alghanliqini éytqan bolsimu, lékin ötken ayda gu'angdung ölkiside 32 yashliq bir er hemde shangxeyde 29 yashliq bir ayal qush zukimi késili bilen ölgen.

Dunya sehiye teshkilatigha oxshash xelq'araliq teshkilatlarning hemmidin endishe qilidighini qush zukimining ademler arisida tarqilip kétishi bolup hésablinidu. 2003‏- Yili qush zukimi deslep bayqilip hazirghiche pütün dunyada 185 kishi qush zukimi wirusi bilen yuqumlinip, 105 kishi qaza qilghan. Hazir bu zukam ottura asiya we yawropadin tartip afriqighiche taraldi. (Peride)