Xitay, amérika ilmiy zhurnilining qush zukam wirusi heqqidiki tetqiqat doklatini "asassiz" dep eyiblidi

Xitay yéza igilik ministirliqi jüme küni muxbirlarni kütüwélish yighini chaqirip, amérika döletlik penler akadimiyisi ilmiy zhurnilining 31 - öktebirdiki sanida élan qilin'ghan qush zukam wirusi heqqidiki tetqiqat doklatini " asasssiz perez "dep tenqid qildi. Mezkur tetqiqat doklati xitaydaH5N1 tipliq ejellik qush zukam wirusining özgergen tipi peyda bolghanliqini we tarqiliwatqanliqini, buning "fujyen wirusi" dep atilidighanliqini ilgiri sürgen.

Bu tetqiqat doklatini teyyarlighan mutexessisler ichide xongkong uniwérsititining qush zukam wirusi mutexessisi gu'en yiy bilen malik périslar we amérika sant judi's balilar tetqiqat doxturxanisining mutexessisi robért webstérlar bar idi. Doklatta, fujyen wirusi ötken bir yildin béri xitayning 6 ölkisi we jenubiy asiya döletliride körülgenliki, bu wirusning 3 - qétim partlaydighanliqini agahlandurghan. Lékin xitay yéza igilik ministirliqi haywanatlar idarisining mudiri jya yöling muxbirlarni kütüwélish yighinida, tetqiqat doklati teyyarlighan mutexessislerni wirus ölgisini qanunsiz yighish we assisiz xulase chiqirish bilen eyiblidi. U, qush zukam wirusining özgergen yéngi tipi "fujyen wirosi" mewjüt emes, deydu.

Bu doklat élan qilin'ghandin kéyin, dunya sehiye teshkilati xitayni yéngi bayqalghan wirus ölgisi bilen teminlimidi, dep eyibligen. Dunya sehiye teshkilatining emeldari juliye xoll, xitayning 2004 -yildin kéyin dunya sehiye teshkilatini wirus ölgisi bilen teminlep baqmighanliqini ilgiri sürgen. (Erkin)