Gu'angjuda tarqalghan qush zukimi xitayni chöchütmekte

Xongkong sehiye idarisining bildürüshiche, xitay emeldarliri hazir xitayning gu'angju shehiride qush zukimining bazardiki öy qushlirining ölüshini keltürüp chiqarghanliqini muqimlashturghan.

Birleshme agéntliqining neqil élip körsitishiche, xongkong sehiye idarisi aldinqi küni élan qilghan bayanatida gu'angju shehiride ölgen qushlarda qush zukimi wirusi bayqalghan bolup, bu xitayda bu yil 5 - qétim bu xildiki qush zukimi wirusi tarqilishi bolup hésablinidu.

Xitay yéza igilik ministirlikining tor bétide körsitilishiche, bu hepte gu'angju shehiride körülgen qosh zukimi tarqilish hadisiside 114 dane qush ölgen bolup, netijide xadimlar yuqumlan'ghan 518 dane qushni özi öltürüwetken.

Melum bolushiche, mezkur zukam 2003 - yili asiya qush bazirida bayqalghandin buyan hazirgha qeder 20 adem bu wirusta yuqumlinip ölgen bolup, hazirche xitayda qush zukimi bilen ölgen adem sani üchke yétidu.

Ikki ösmürning yuqumluq zukam wirusida ölgenliki xewer qilin'ghandin kéyin, xongkong sehiye idarisi bashliqi ju yiyö buyruq chüshürüp xongkongda barliq yesli we bashlan'ghuch mekteplerning ikki hepte taqilidighanliqini uqturghan idi. (Jüme)