Kondaliza rayis, sh h t ning amérika herbiy qisimlirini chékindürüsh toghrisidiki teleplerni ret qildi

Xitayni ziyaret qiliwatqan amérika tashqi ishlar ministiri kondaliza rayis yekshenbe küni xitay tashqi ishlar ministiri li jawshing bilen uchrashqandin kéyin, muxbirlargha bergen bayanatida, xitay rehberliri bilen ötküzgen söhbiti jeryanida, kishilik hoquq, diniy erkinlik we xitay pulining qimmiti qatarliq mesililerni otturigha qoyghanliqini bildürdi.

Amérika tashqi ishlar ministiri rayis xanim yene shangxey hemkarliq teshkilatining, amérikining ottura asiyadiki herbiy qisimlirini chékindürüsh waqti toghrisidiki telipini ret qilip, afghanistanning hélimu amérika herbiy qisimlirigha éhtiyaji barliqini bildürdi.

Fransiye agéntliqining bildürüshiche, kondaliza rays béyjingda muxbirlargha bergen bayanatida mundaq dégen: "afghanistan hökümiti amérika herbiy qisimlirining afghanistanda turushi kéreklikini bildürmekte. Afghanistan musteqil bir dölet. Bu dölette xelq teripidin saylan'ghan bir prézidént hökümranliq qiliwatidu. Shuning üchün bizning afghanistan bilen bolghan munasiwitimiz mushu hökümet arqiliq bolidu. Afghanistanda hélimu térrorluq pa'aliyetliri dawamlishiwatidu. Bizning bilishimizche, afghanistan xelqi hélimu amérika herbiy qisimlirining yardimige muhtaj".

Shangxey hemkarliq teshkilatigha eza döletlerning dölet rehberliri ötken hepte qazaqistanning paytexti astanida ötküzgen aliy derijilik yighinida birleshme bayanat élan qilip, amérika hökümitidin qirghizistan we özbékistandiki herbiy qisimlirini chékindürüp chiqishni telep qilghan idi. (Eqide)