Xitay hökümiti sendungda bir yazghuchini dölet hakimiyitige qarshi turush jinayiti bilen sotlidi


2006-04-13
Share

Xitayning sendung ölkisi zibo shehiridiki bir ottura xelq sot mehkimisi, tor bétige xitay da'irilirini tenqidleydighan siyasiy maqale yazghan we jem'iyettiki sezgür mesililer üstide pikir yürgüzgen bir ixtiyari obzorchini dölet hakimiyitige qarshi turush jinayiti bilen eyibleshke bashlidi. Mezkür obzorchi li jyenpingning soti charshenbe küni sendungning zibo sheherlik ottura xelq sot mehkimiside bashlandi.

Birleshme axbarat agéntliqining xewer qilishiche, li jyenping teptish da'irilirining eyiblishini ret qilghan. Bu yil 40 yashtiki li jyenping 1989 - yil yüz bergen tyen'enmin démokratiye herikitining ishtirakchiliridin biri bolup, intérnétke maqale yazidighan ixtiyari obzorchi idi. U, ötken yili 5 - ayda qolgha élin'ghan. Li jyenpingning adwukati jang shingxuy sot mehkimiside li jyenpingni aqlap, " u jem'iyet siyasitini tenqid qilghan we bezi jiddiy mesililer we sezgür témilar üstide pikir yürgüzgen " deydu. Jang shingxuning eskertishiche, u li jyenpingni" özining köz qarishini ipadilesh hoquqigha ige we uning bu herikiti jinayet shekillendürgen, dep qarimaydiken ".

Teptish da'iriliri li jyenpingni chet'elde xitayche chiqidighan tor betlirige maqale yazghan, dep eyiblidi. Lékin xitay hökümitining bu herikiti xelq'ara kishilik hoquq teshkilatlirining eyiblishige uchrimaqta. Xitay da'iriliri ilgiri Uyghur yazghuchi nurmuhemmet yasinni bölgünchilikni terghip qilidighan maqale we hikayilerni yazghan, dep 10 yilliq qamaq jazasigha höküm qildi. U, hazir ürümchidiki bir türmide jazasi mudditini ötimekte. 2005 - Yili 11 - ayda b d t kishilik hoquq kéngishining nazaretchisi manfrid nowak, ürümchini tekshürüshke barghanda numuhemmet yasin bilen söhbet ötküzgen.

Pikirler (0)

Barliq pikir - bayanlarni körüsh.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet